لکھنؤ، 31؍اگست(ایس او نیوز/آئی این ایس انڈیا)اترپردیش جیسی بڑی ریاست میں سب سے کم عمر میں وزیر اعلی بننے والے اکھلیش یادو نے آج اپنی اس کامیابی کا کریڈٹ اپنے والد ملائم سنگھ یادو کے آشیرواد اور قسمت کو دیا ہے۔اکھلیش نے آج اسمبلی میں جذباتی لہجے میں کہا کہ مجھے یہ موقع نیتا جی(ملائم سنگھ )نے دیا ہے ، یہ قسمت ہے، کئی بار قسمت سے چیزیں مل جاتی ہیں ،د وسرے لوگوں کو اس عہدے تک پہنچنے کے لیے بہت جدوجہد کرنی پڑتی ہے۔تقریبا ساڑھے چار سال پہلے 15؍مارچ 2012کو 38سال کی عمر میں سب سے کم عمر کے وزیر اعلی بنے اکھلیش نے ایوان میں 25سال یا اس سے زیادہ مدت تک رکن رہ چکے 10سینئر ممبران اسمبلی کواعزاز سے نوازنے کے بعد ایوان سے خطاب کر رہے تھے۔انہوں نے بااعتماد لہجہ میں کہاکہ سیاست سے مشکل کوئی کام نہیں ہے ، جن ممبران اسمبلی نے 25یا اس سے زیادہ وقت تک ایوان کے رکن رہنے کا اعزاز حاصل کیا ہے، انہوں نے یقیناًعوام کا دل جیتا ہو گا ۔اکھلیش نے مزاحیہ لہجے میں کہاکہ ہم تمام لوگ 25سال مکمل کریں ، تبدیلی قدرت کا قانون ہے ،تبدیلی آتی ہے اور ہم چاہتے ہیں کہ ہم دوبار ہ 2017میں اقتدار میں آئے۔واضح رہے کہ تقریبا 25سال میں اتر پردیش کی سیاست میں کوئی حکومت مسلسل دو بار اقتدار میں نہیں آئی ہے ۔وزیر اعلی نے آج ایوان میں جن 10اراکین اسمبلی کو ایوان میں 25یا اس سے زیادہ سالوں کے لیے اپنی خدمات کے لیے اعزاز سے نوازا ، ان میں اسمبلی کے اسپیکر ماتا پرساد پانڈے پارلیمانی امورکے وزیر اعظم خاں کے علاوہ اودھیش پرساد ،درگا پرساد یادو، نارائن سنگھ یادو، راجیو کمار سنگھ اور رام گووندر چودھری (ایس پی )کے علاوہ بی جے پی کے سریش کھنہ اور شیام سندر رائے چودھری اور بی ایس پی کے شیام سندر شرما شامل ہیں۔معزز اراکین کو وزیر اعلی اور اسمبلی صدر کی جانب سے شال اور تحائف پیش کئے گئے۔