جی ٹی اے سے بمل گرونگ کااستعفیٰ، ممتا حکومت کے خلاف سی بی آئی جانچ کی مانگ
دارجلنگ،23جون؍(ایس او نیوز/آئی این ایس انڈیا) دارجلنگ میں چل رہا احتجاج تھمنے کا نام ہی نہیں لے رہا ہے،عام زندگی متاثر ہے۔ان سب کے سبب جی ٹی اے ( Gorkhaland Territorial Administration ) کے چیف ایگزیکٹو آفیسر کے عہدے سے بمل گرونگ نے استعفی دے دیا ہے،ساتھ ہی انہوں نے کہا کہ فائرنگ کی سی بی آئی جانچ کی جائے۔انہوں نے کہا کہ غیر یقینی بند اب بھی جاری رہے گا۔تمام میٹنگیں اب 29جون تک منسوخ کر دی گئی ہے۔اس کے ساتھ ہی انہوں نے کہا کہ 27جون کو ہم جی ٹی اے ایکٹ اور معاہدے کو جلا دیں گے۔وہیں گورکھا لینڈ جن مکتی مورچہ (جی جے ایم)کے 43ارکان نے بھی گورکھا لینڈ علاقائی انتظامیہ (جی ٹی اے)سے استعفی دے دیا ہے۔جی جے ایم کے جنرل سکریٹری روشن گری نے کہا کہ جی ٹی اے کو مغربی بنگال حکومت نے مذاق بنا کر رکھ دیا ہے۔جی جے ایم اور علاقے کی عوام الگ گورکھا لینڈ کے واحد ایجنڈے کے لئے جدوجہد کرے گی۔وہیں سکم کے وزیر اعلی پون چاملنگ نے الگ گورکھا لینڈ ریاست کے لئے اپنی حمایت بڑھاتے ہوئے کہا تھا کہ یہ دارجلنگ کے لوگوں کی آئینی مانگ کو پورا کرے گا۔ساتھ ہی اس علاقے میں پائیدار امن لے آئے گا۔سکم کے حکمراں پارٹی کی طرف سے منعقدہ اجلاس میں یہ فیصلہ لیا گیا کہ وہ ایک علیحدہ ریاست کے لئے حمایت بڑھائیں گے، ساتھ ہی دارجلنگ میں غیر قانونی، جمہوری اور غیر آئینی کارروائیوں کی مخالفت کریں گے۔بتا دیں کہ بنگال حکومت نے اندازہ لگایا ہے کہ چل رہے تشدد اور ہڑتال سے پہاڑیوں کو تقریبا 150کروڑ کا نقصان ہوا ہے۔پورے بنگال کے اسکولوں میں بنگالی پڑھائے جانے کو لازمی کئے جانے اور نئی ریاست کی مانگ کی وجہ سے تشدد بھڑکا تھا۔اس کی وجہ سے وزیر اعلی ممتا بنرجی کے دورے کے خلاف گورکھا جن مکتی مورچہ پورے پہاڑی علاقوں میں احتجاج کر رہی ہے۔