بنگلورو،24؍ستمبر(ایس او نیوز) ریاستی لیجسلیٹیو کونسل سے خالی ہونے والی تین سیٹوں کو پر کرنے کے لئے 4؍ اکتوبر کو ہونے والے انتخاب کے لئے دو کانگریس امیدواروں نصیر احمد اور ایم سی وینو گوپال نے آج ریٹرننگ افسر کے دفتر میں اپنے کاغذات نامزدگی جمع کروائے۔ نائب وزیراعلیٰ ڈاکٹر جی پرمیشور ، وزراء کے جے جارج ، ڈی کے شیوکمار ، سابق وزراء سی ایم ابراہیم ، رحمن خان ، تنویر سیٹھ ، کے پی سی سی کارگزار صدر ایشور کھنڈرے ، رکن پارلیمان کے ایچ منی اپا اور دیگر کی موجودگی میں یہ پرچۂ نامزدگی داخل کیا گیا۔
پرچۂ نامزدگی داخل کرنے کے بعد اخباری نمائندوں سے بات چیت کرتے ہوئے نصیر احمد نے کہاکہ پارٹی نے مختلف سطحوں پر انتخابات کے مرحلوں میں اور دیگر موقعوں پر پارٹی کے لئے ان کی خدمات کا اعتراف کرتے ہوئے تیسری مرتبہ انہیں بحیثیت رکن کونسل منتخب ہونے کا موقع فراہم کیا ہے، اس کے لئے وہ پارٹی قیادت کے ممنون ہیں۔ انہوں نے کہاکہ اس سے پہلے انہیں کونسل کے لئے بلدی اداروں کے ذریعے منتخب ہونے کا دومیعادوں کے لئے موقع فراہم کیا گیا تھا ۔ایک اور امیدوار وینوگوپال نے کہاکہ وفادار کارکنوں کو پارٹی کی طرف سے انعام کے طور پر انہیں کونسل کی رکنیت دی گئی ہے۔ پارٹی کے لئے انہوں نے کم عمری سے ہی جدوجہد کی ہے۔ ان خدمات کے اعتراف نے پارٹی نے انہیں جو موقع فراہم کیا ہے اس کے لئے وہ پارٹی کے شکرگزار ہیں۔
نائب وزیراعلیٰ ڈاکٹر جی پرمیشور نے کہاکہ تین خالی نشستوں میں سے کانگریس نے دو نشستیں اور جے ڈی ایس کے حق میں ایک نشست دے دی ہے۔ نائب وزیراعلیٰ نے کہاکہ ان تینوں سیٹوں پر کانگریس کی کامیابی یقینی ہے کیونکہ ایوان میں کانگریس کو واضح اکثریت حاصل ہے۔ انہوں نے کہاکہ عنقر یب ریاستی کابینہ میں توسیع کے عمل کو بھی پورا کرلیا جائے اور ساتھ ہی سرکاری بورڈز اور کارپوریشنوں کے لئے چیرمینوں کا تقرر بھی کردیا جائے گا۔ اس انتخاب میں جے ڈی ایس کی طرف سے بنگلور ضلع یووا جنتا دل ایس کے صدر رمیش گوڈا کو میدان میں اتارا گیا ہے۔ ان تینوں کے بلامقابلہ منتخب ہوجانے کے آثار نمایاں نظر آرہے ہیں۔