کانگریس کی صفائی، کہاوہ تمام مذاہب اور گروہوں کی پارٹی ہے
نئی دہلی ،16جولائی (ایس او نیوز؍آئی این ایس انڈیا)کانگریس صدر راہل کے ’مسلم پارٹی‘والے مبینہ بیان کو لے کر کھڑے ہوئے تنازعہ پر کانگریس نے آج پھر کہا کہ وہ کسی ایک گروپ کی نہیں بلکہ تمام مذاہب، قوموں اور گروہوں کی پارٹی ہے۔
گاندھی کے’مسلم پارٹی‘والے مبینہ بیان کو شائع کرنے والے اردو روزنامہ نے آج پھر ایک خبر کے ذریعے دعوی کیا کہ پارٹی کے اقلیتی محکمہ کے چیئرمین ندیم جاوید نے کانگریس صدر کے مبینہ بیان کی حمایت کی ہے۔اس بارے میں پوچھے جانے پر کانگریس کے ترجمان سشمیتا دیو نے کہاکہ مجھے نہیں پتہ کہ ندیم جاوید نے کیا بیان دیا ہے، لیکن اتنا ضرور کہنا چاہتی ہوں کہ کانگریس تمام مذاہب، قوموں اور گروہوں کی پارٹی ہے۔
پارٹی کے مرکزی ترجمان ردیپ سرجیوالا نے کچھ دنوں پہلے ہی ’مسلم پارٹی‘والی خبر کو خارج کرتے ہوئے کہا تھا کہ نریندر مودی حکومت کی ناکامیا ں چھپانے کے لئے افواہیں پھیلائی جا رہی ہیں۔ادھر کانگریس کے سینئر عہدیدار نے کہاکہ اس طرح کی خبریں پولرائزیشن اور اصل مسائل سے توجہ بھٹکانے کے لئے پھیلائی جا رہی ہیں۔ایجنڈا پرمبنی ان خبروں کو زیادہ توجہ نہیں دینی چاہیے۔