کرناٹک میں بی جے پی کا الیکشن کمیشن پرجانبداری برتنے کا الزام
بنگلورو،23؍اپریل(ایس او نیوز) بی جے پی نے انگور کھٹے کی مانند اب یہ الزام لگارہی ہے کہ الیکشن کمیشن ریاست میں کانگریس کی جیت کے لئے کام کررہا ہے۔ کرناٹک میں بی جے پی امور کے انچارج مرلی دھر راؤ نے آج ایک اخباری کانفرنس میں الزام لگایا کہ ریاستی الیکشن کمیشن کانگریس کی ایماء پر متحرک ہے، بی جے پی کارکنوں کے گھروں سے زبردستی پارٹی کے جھنڈے اتارے جارہے ہیں ، الیکشن کمیشن کی اس زیادتی کی جانب مرکز الیکشن کمیشن کو متوجہ کرانے کے لئے بی جے پی کے سبھی کارکنوں سے کہا گیا ہے کہ وہ 25؍ اپریل کو اپنے گھروں پر پارٹی کے جھنڈے لہرائیں۔ انہوں نے کہاکہ ریاستی الیکشن کمیشن بنگلور سمیت ریاست بھر میں کانگریس کی کامیابی کے لئے کام کررہا ہے۔ انہوں نے کہاکہ پارٹی کارکنوں سے بی جے پی نے کہا ہے کہ اپنے اپنے حلقوں میں ہر گھر پر بی جے پی پرچم لہرانے کی کوشش کریں۔ مرلی دھر راؤ نے کہاکہ ریاستی اور ضلعی انتخابی افسران اپنے اختیارات کا غلط استعمال کرتے ہوئے سدرامیا انتظامیہ کو دوبارہ بحال کرنے کے لئے کام کررہے ہیں۔ انہوں نے کہاکہ انتخابی ضابطۂ اخلاق پامال کرنے کی جھوٹی شکایات دائر کی جارہی ہیں اور ان شکایات پر الیکشن کمیشن کی طرف سے کارروائی بھی کی جارہی ہے۔ اس سلسلے میں مرکزی الیکشن کمیشن سے شکایت کی گئی ہے۔ انہوں نے کہاکہ وزیراعلیٰ سدرامیا نے چند اہم حلقوں میں اپنے مطلوبہ افسران وقت سے پہلے ہی متعین کروالئے ہیں۔ اس موقع پر انہوں نے بتایاکہ ریاست میں پارٹی کی انتخابی مہم چلانے کے لئے وزیر اعظم مودی ، پارٹی صدر امت شاہ ، وزیر داخلہ راجناتھ سنگھ ، وزیرٹرانسپورٹ نتن گڈکری ، وزیر خارجہ سشما سوراج ، اترپردیش کے وزیر اعلیٰ یوگی آدتیہ ناتھ ، مدھیہ پردیش کے وزیر اعلیٰ شیوراج سنگھ چوہان، چھتیس گڑھ کے وزیراعلیٰ رمن سنگھ ، مرکزی وزراء اوما بھارتی، اسمرتی ایرانی اور دیگر لیڈران شریک رہیں گے۔