ہماچل انتخابات کے لیے کانگریس کے اسٹار تشہیرکاروں میں سونیا گاندھی کا بھی نام
نئی دہلی،23؍اکتوبر (ایس او نیوز؍آئی این ایس انڈیا )ہماچل پردیش میں اپنا تختہ بچانے کی کوشش میں مصروف کانگریس نے اسمبلی انتخابات کے لئے 40 اسٹار تشہیر کار کی اپنی فہرست جاری کر دی ہے۔ اس لسٹ میں کانگریس صدر سونیا گاندھی کے علاوہ راہل گاندھی، سابق وزیر اعظم منموہن سنگھ کو شامل کیا گیا ہے۔الیکشن کمیشن کو سونپی گئی اس لسٹ میں کیپٹن امریندر سنگھ اور ویربھدر سنگھ کے علاوہ سکھوندر سنگھ سکھو کو بھی جگہ دی گئی ہے۔ یہاں غور کرنے والی بات یہ ہے کہ گزشتہ دنوں ویر بھدر سنگھ اور ریاستی کانگریس کے سربراہ سکھودر سنگھ سکھو کے درمیان رسہ کشی کی خبریں آ رہی تھیں۔بتا دیں کہ ہماچل میں 9 نومبر کو پولنگ ہوگی اور 18 دسمبر کو ووٹوں کی گنتی ہوگی۔ کانگریس نے کچھ ہی دن پہلے تمام 68 سیٹوں پر اپنے امیدواروں کی فہرست جاری کی تھی۔ شملہ دیہی اسمبلی سیٹ سے سبکدوش ہونے والے وزیر اعلی ویر بھدر سنگھ کے بیٹے وکرمادتیہ سنگھ کو پارٹی نے امیدوار بنایا ہے۔وہیں منڈی سیٹ سے سبکدوش ہونے والے وزیر کول سنگھ ٹھاکر کی بیٹی چمپا سنگھ کو پارٹی نے ٹکٹ دیا ہے۔