بنگلورو،18؍اکتوبر (ایس او نیوز؍عبدالحلیم منصور) سابق وزیر اعلیٰ اور ریاستی جنتادل (ایس) صدر ایچ ڈی کمار سوامی نے الزام لگایا کہ گجرات اسمبلی انتخابات کیلئے سیاسی فنڈز کا انتظام بنگلور سے کیاجارہاہے۔ اخباری نمائندوں سے بات چیت کرتے ہوئے کمار سوامی نے کہاکہ ریاست میں حکمران کانگریس پارٹی گجرات اسمبلی انتخابات میں جیت درج کرنے کیلئے کرناٹک کو استعمال کررہی ہے۔ انہوں نے کہاکہ شہر بھر میں موسلادھار بارش کے بعد بڑے نالوں سے گندگی کی نکاسی کے نام پر جو فنڈ جاری کیا جارہاہے اس کا بیشتر حصہ گجرات اسمبلی انتخابات میں صرف کرنے پر روانہ کیاجارہاہے۔ شہر بنگلور میں بارش کی تباہی اور عوام کو ہورہی پریشانی کیلئے بی جے پی کو راست طور پر ذمہ دار ٹھہراتے ہوئے کمار سوامی نے کہاکہ پانچ سال بی بی ایم پی میں اقتدار پر رہ کربی جے پی نے شہر کے ڈرینج نظام اور نالیوں کی صفائی کیلئے کوئی قدم نہیں اٹھایا۔ اب جبکہ شہر کے نشیبی علاقوں میں لوگوں کو دشواریوں کا سامنا کرنا پڑ رہا ہے تو اس پر گندی سیاست کرنے بی جے پی میدا ن میں اتر آئی ہے۔ پانچ سال بی بی ایم پی کے اقتدار پر قابض رہ کر بی جے پی نے صرف فرضی بلوں کے عوض رقم بٹور نے کے علاوہ کوئی کام نہیں کیا ۔ انہوں نے کہاکہ بی بی ایم پی میں بی جے پی نے جو لوٹ مچائی ان فائلوں کو بھی آگ حادثہ میں جلادیا گیا۔ اس موقع پر سابق وزیر ایچ وشواناتھ ، رکن کونسل ٹی اے سرونا اور دیگر لیڈران موجود تھے۔