کانگریس قیادت کو شیوکمار کی طرف سے کوئی رقم نہیں ملی: ووہرہ
بنگلورو:4/ اگست(ایس او نیوز) آل انڈیا کانگریس کمیٹی نے ان خبرو ں کی تردید کی ہے کہ ریاستی وزیر توانائی ڈی کے شیوکمار نے پارٹی کیلئے فنڈ روانہ کیا ہے۔ الیکٹرانک میڈیا کے بعض حلقوں میں اس دعوے پر کہ شیوکمار کی طرف سے اے آئی سی سی کو کروڑوں روپیوں کی رقم مہیا کرائی گئی ہے، اے آئی سی سی جنرل سکریٹری موتی لال ووہرہ نے سخت تردید کی ہے۔ انہوں نے کہا کہ آئی ٹی محکمہ کی طرف سے شیوکمار کے ٹھکانوں پر چھاپوں کے دوران ضبط شدہ دستاویزات کا حوالہ دے کر میڈیا کے بعض حلقوں میں کانگریس اعلیٰ کمان کو بدنام کرنے کی جو کوشش کی جارہی ہے وہ قابل مذمت ہے۔ ڈی کے شیوکمار یا کسی سے بھی کانگریس اعلیٰ کمان کی طرف سے بھاری رقم حاصل کرنے کا الزام یکسر بے بنیاد ہے۔ یہ بھی الزام لگایا گیا ہے کہ محکمۂ انکم ٹیکس کے چھاپوں کے دوران ایگل ٹن ریسارٹ پر شیوکمار نے ایک ڈائیری کی پرچیاں پھاڑ دیں۔ بعض قومی ٹی وی چینلوں پر اس طرح کی خبریں پھیلائے جانے کی کانگریس نے سخت مذمت کی اور کہاکہ اس طرح کی بے بنیاد خبروں کو عام کرنے سے پہلے میڈیا کی یہ ذمہ داری ہے کہ اس کی تصدیق کرلیں۔