بنگلورو۔20؍فروری (ایس او  نیوز) کانگریس لیڈر نارائن سوامی کے  بی بی ایم پی دفتر میں گھس کر پٹرول چھڑکنے اوردفتر کو آگ لگادینے کی دھمکی کی وڈیو نیوز چینلوں میں نشر ہونے کے بعد فوری حرکت کرتے ہوئے سدرامیا نے نارائن سوامی کو   کانگریس پارٹی سے باہر کا راستہ دکھادیا ہے۔

ذرائع سے ملی اطلاع کے مطابق  نارائن سوامی کرشنا راج پورم علاقہ سے کانگریس کے کارکن ہیں اورکے آر پورم بلاک کانگریس کے صدر ہونے کے ساتھ ساتھ بی بی ایم پی کے ایک نامزد کارپوریٹر بھی ہیں۔

بتایا گیا ہے کہ نارائن سوامی نے 16 فروری کو ہوراماؤ بی بی ایم پی دفتر پہنچ کر وہاں کے اسسٹنٹ ریوینیو آفیسر چنگل رایپا کو ایک جائیداد کا کھاتہ بناکر دینے کی ہدایت دی۔ جب چنگل رایپا نے قانونی تقاضوں کا حوالہ دیا تو نارائن سوامی بھڑک اُٹھے  اور دفتر میں پٹرول چھڑک کر آگ لگادینے کی دھمکی دی۔ پورا منظر  سی سی ٹی وی کیمرہ میں قید ہوگیا اور  مختلف ٹی وی چینلوں نے  اس واقعہ کی خبر نشر کی۔

واقعے کی اطلاع ملتے ہی ریاستی وزیراعلیٰ سدرامیا نے  نارائن سوامی کو کانگریس پارٹی سے نکالنے کا فیصلہ کرنے کے ساتھ پولیس حکام کو ہدایت دی کہ وہ اس کے خلاف  سخت سے سخت کارروائی کرے۔

اُدھر بی بی ایم پی ملازمین کی اسوسی ایشن نے مطالبہ کیا ہے کہ نارائن سوامی کو فوراً گرفتار کیا جائے، بتایا گیا ہے کہ پولیس میں مختلف دفعات کے تحت نارائن سوامی کے خلاف معاملہ درج کیاگیا ہے۔