بی بی ایم پی میں کانگریس جے ڈی ایس اتحاد برقرار: رام لنگا ریڈی
بنگلورو،21؍ستمبر(ایس او نیوز؍عبدالحلیم منصور) وزیر داخلہ رام لنگا ریڈی نے کہاکہ برہت بنگلور مہانگر پالیکے میں کانگریس اور جنتادل (ایس) اتحاد برقرار رہے گا۔آج اس سلسلے میں انہوں نے سابق وزیر اعلیٰ اور ریاستی جنتادل (ایس) صدر ایچ ڈی کمار سوامی سے ملاقات کی اور انہیں اس بات پر باور کروانے میں کامیاب ہوگئے کہ بی بی ایم پی میں کانگریس اور جے ڈی ایس اتحاد برقرار رہے۔ اخباری نمائندوں سے بات چیت کرتے ہوئے مسٹر ریڈی نے کہاکہ انہوں نے کمار سوامی کو اس بات پر راضی کروالیا ہے کہ بی بی ایم پی میں بڑی پارٹی ہونے کے ناطے میئر کا عہدہ کانگریس کے پاس رہے، جہاں تک مختلف اسٹانڈنگ کمیٹیوں کی چیرمین شپ کا مسئلہ ہے اس پر تفصیلی بات چیت کی جاسکتی ہے۔ انہوں نے کہاکہ کمار سوامی نے بھی اس سلسلے میں مثبت رویہ ظاہر کیا اور انہیں یقین ہے کہ بی بی ایم پی میں کانگریس جے ڈی ایس اتحاد برقرار رہے گا۔ انہوں نے کہاکہ جے ڈی ایس کی طرف سے جو بھی شرائط رکھی گئی ہیں اسے وہ جلد ہی وزیراعلیٰ سدرامیا اور کے پی سی سی صدر ڈاکٹر جی پرمیشور کو آگاہ کرائیں گے۔ انہوں نے کہاکہ ایچ ڈی کمار سوامی سے ان کی ملاقات صرف خیر سگالی نوعیت کی رہی، چونکہ آج سے کمار سوامی علاج کیلئے اسپتال میں داخل ہوچکے ہیں اس سے پہلے اپنی نیک تمناؤں کا اظہار کرنے کیلئے انہوں نے کمار سوامی سے ملاقات کی، اسی ملاقات کے دوران وہ کمار سوامی کو اس بات پر راضی کرنے میں کامیاب رہے۔