بنگلورو۔12؍اپریل(ایس او نیوز) وزیر اعلیٰ سدرامیا کے خلاف کھل کر نکتہ چینی کرنے والے سابق وزیر ایچ وشواناتھ کو کانگریس اعلیٰ کمان نے دہلی طلب کیاہے۔ وشواناتھ کو کانگریس اعلیٰ کمان کی طرف سے بلاوا سیاسی حلقوں میں ہلچل کا سبب بن گیا ہے۔ کرناٹک پردیش کانگریس کمیٹی میں تبدیلیاں لانے مرکزی قیادت کی تیاریوں کے متعلق قیاس آرائیوں کے درمیان وشواناتھ کو کل رات دہلی آنے کی دعوت دی گئی اور وہ فوری طور پر روانہ ہوگئے۔ ریاستی انتظامیہ بالخصوص وزیراعلیٰ سدرامیا کے طریقۂ کارپر اپنی ناراضگی کا اظہار کرنے والے وشواناتھ دیگر سینئر کانگریس لیڈران جناردھن پجاری اورجعفر شریف کی صف میں شمار کئے جارہے تھے۔ حالانکہ کے پی سی سی نے ان تینوں کے خلاف تادیبی کارروائی کرنے کانگریس اعلیٰ کمان سے سفارش کی ہے، تاہم اعلیٰ کمان نے کارروائی کرنے کی بجائے وشواناتھ کو طلب کرکے انہیں سمجھانے کا فیصلہ کیا ہے۔ بتایا جاتا ہے کہ سابق وزیراعظم ایچ ڈی دیوے گوڈا اور سابق وزیراعلیٰ ایچ ڈی کمار سوامی کی طرف سے وشواناتھ کو جنتادل (ایس) میں شامل کرنے کی کوششوں میں تیزی کے فوراً بعد اعلیٰ کمان نے انہیں دہلی طلب کرلیاہے۔بتایاجاتاہے کہ وشواناتھ کے علاوہ کانگریس کے ایک اور سینئر لیڈر سی ایم ابراہیم نے بھی جنتادل (ایس) میں شمولیت پر کھلی آمادگی ظاہر کی ہے اور اس سلسلے میں ان دونوں نے دیوے گوڈا سے ایک دور کی بات چیت بھی کرلی ہے، اسی وجہ سے کانگریس اعلیٰ کمان نے وشواناتھ اور ابراہیم کو الگ الگ دہلی طلب کیا ہے۔ گزشتہ ہفتہ کے آر نگر میں سی ایم ابراہیم اور وشواناتھ کے درمیان ایک میٹنگ ہوئی جس میں ان دونوں نے جنتادل (ایس) میں شمولیت پر آمادگی ظاہر کی، دوسری طرف آج ٹمکور کے سابق رکن پارلیمان اور وظیفہ یاب آئی پی ایس آفیسر پی کوڈنڈا رامیا نے بھی جنتادل (ایس) میں شمولیت کے متعلق دیوے گوڈا سے ایک دور کی بات چیت کی ہے۔اس صورتحال کو دیکھتے ہوئے کانگریس اعلیٰ کمان نے ریاست کے کانگریس قائدین کوپارٹی چھوڑنے کا فیصلہ کرنے سے روکنے کیلئے پہل کی ہے۔ مختلف ایجنسیوں کی طرف سے اگلے اسمبلی انتخابات کے سروے کے متعلق پیش کی جارہی رپورٹوں میں جنتادل (ایس) کو زیادہ سیٹوں پر کامیاب ہونے کے متعلق جو اندیشے ظاہر کئے جارہے ہیں اسے دیکھتے ہوئے کانگریس کے بیشتر لیڈران بی جے پی کی بجائے جنتادل (ایس) کا رخ کرنے کو ترجیح دے رہے ہیں۔حال ہی میں سابق رکن اسمبلی ایس آر شیورامے گوڈا اور ان کے ساتھی شیوکمار بھی جنتادل (ایس) میں شامل ہوگئے۔ جنتادل (ایس) نے باغی رکن اسمبلی این چلووارایا سوامی کی جگہ ناگمنگل اسمبلی حلقہ سے ایل آر شیورامے گوڈا کو امیدوار بنانے کا فیصلہ کیا ہے۔