نئی دہلی:17/نومبر(ایس او نیوز/آئی این ایس انڈیا)کانگریس نے پنجاب حکومت کے وزیر اور اسمبلی انتخابات میں پارٹی کے اسٹار پرچارک کا کردار ادا کر رہے نوجوت سنگھ سدھو پر ’’خطرات ‘‘کے پیش نظر وزارت داخلہ کی طرف سے ان کے لیے پورے ملک میں مرکزی صنعتی سیکورٹی فورس (سی آئی ایس ایف) کی سیکوریٹی فراہم کئے جانے کی اپیل کی ہے۔ پارٹی کے مرکزی ترجمان رندیپ سرجے والا نے وزیر داخلہ راج ناتھ سنگھ کو لکھے گئے خط میں کہا کہ سدھو معروف سیاسی شخصیت اور سابق کرکٹر ہیں، انہوں نے پنجاب میں منشیات کے مافیا کے خلاف مہم چلائی ہے۔ان سے پورے ملک میں لوگ محبت کرتے ہیں۔ انہوں نے کہا کہ سدھو ہمیشہ نشانے پر رہے ہیں، بی جے پی چھوڑ کر کانگریس میں شامل ہونے کے بعد ان کے لئے خطرے بڑھتے دیکھے گئے ہیں۔ سرجیوالا نے کہا کہ سدھو انتخابی مہم اور پارٹی کے دوسرے پروگراموں کے لئے ملک بھر میں دورہ کر رہے ہیں۔ ایسے میں اپیل کرتا ہوں کہ سدھو کو پورے ملک میں سی آئی ایس ایف کی سیکورٹی فراہم کی جائے۔ واضح رہے کہ سدھو ان دنوں چھتیس گڑھ میں انتخابی مہم پر ہیں ۔اس کے بعد راجستھان اور مدھیہ پردیش میں بھی وہ انتخابی مہم کے لئے جائیں گے۔