لوک سبھا انتخابات میں کانگریس جے ڈی ایس اتحاد کی پہل، کانگریس میں اعلیٰ کمان کی سطح پر ریاستی قائدین کی کامیاب بات چیت
بنگلورو،24؍ستمبر(ایس او نیوز) آنے والے لوک سبھا انتخابات میں کانگریس اور جے ڈی ایس کے درمیان مفاہمت کے سلسلے میں قومی سطح پر بات چیت کا پہلا دور کامیاب رہا ہے۔ لوک سبھا انتخابات کے لئے مختلف ریاستوں میں سیکولر سیاسی جماعتوں سے اتحاد کی پہل کو آگے بڑھاتے ہوئے مرکزی قیادت نے جے ڈی ایس کے نمائندوں کے ساتھ کامیاب بات چیت کی ہے۔ دہلی میں قائم کانگریس کی وار روم میں یہ بات چیت کی گئی ، جس میں خود صدر کانگریس راہل گاندھی بھی موجود رہے۔ بتایاجاتا ہے کہ بات چیت کے دوران اے آئی سی سی جنرل سکریٹری انچارج برائے کرناٹک کے سی وینو گوپال ، لوک سبھا میں کانگریس پارٹی کے لیڈر ملیکارجن کھرگے ، سابق وزیر اعلیٰ سدرامیا ، نائب وزیراعلیٰ ڈاکٹر پرمیشور اور دیگر لیڈر موجود تھے۔ لوک سبھا انتخابات سے قبل کانگریس کی طرف سے سیکولر سیاسی جماعتوں کے ساتھ عظیم اتحاد قائم کرنے کے لئے جو پہل کی گئی ہے اس کے تحت اب تک دس ریاستوں میں اتحاد کامیابی سے قائم کرلیا گیا ہے۔ کرناٹک میں جے ڈی ایس سے کانگریس کے اتحاد کے مختلف پہلوؤں کا جائزہ لیا گیا اور حالیہ بلدی انتخابات کے نتائج کی روشنی میں بیشتر لیڈروں نے یہی رائے دی ہے کہ لوک سبھا انتخابات میں بھی اگر یہی اتحاد برقرار رہاتو ریاست میں کانگریس اور جے ڈی ایس دونوں کے امکانات بہتر ہوں گے اور 28 میں سے 20تا23 سیٹوں پر یہ اتحاد کامیاب ہوسکتا ہے۔ اس اتحاد کا نتیجہ یہ بھی ہوگا کہ پہلے ہی اترپردیش، بہار ، مدھیہ پردیش اور راجستھان میں کمزور پڑتی ہوئی بی جے پی کو کرناٹک سے جو آخری امیدوابستہ ہے اس پر بھی پانی پھیرا جاسکتا ہے۔ کرناٹک کی 28 سیٹوں میں سے اگر بی جے پی چند سیٹوں پر سمٹ کر رہ گئی تو قومی سطح پر بی جے پی کے اعداد متاثر ہوں گے۔ اس دوران میٹنگ میں طے کیا گیا کہ لوک سبھاانتخابات کے لئے کرناٹک میں 2تا19 اکتوبر کانگریس کی رابطہ مہم چلائی جائے گی۔ اس مہم کے دوران پولنگ بوتھ سطحوں تک پہنچ کر پارٹی لیڈر اور کارکن عوام میں بیداری لائیں گے اور انتخابات کے لئے پارٹی کو مستعد کریں گے۔ بتایاجاتاہے کہ 28اسمبلی حلقوں میں 20کانگریس اور 8جے ڈی ایس کو دینے پر میٹنگ میں تبادلۂ خیال کیاگیا ہے۔ حلقوں کا تعین دونوں پارٹیوں سے بات چیت کے بعد کیا جائے گا۔