تہواروں کے دوران تشدد پر سخت کارروائی ہوگی: وزیر اعلیٰ کاگنیش چترتی اور بقرعید کے پیش نظر حفاظتی انتظامات کا جائزہ
بنگلورو،22/اگست(ایس او نیوز) آئندہ دنوں میں گنیش تہوار اور بقرعید آرہے ہیں، اس کے پیش نظر محکمۂ پولیس کی جانب سے کئے گئے انتظامات کا وزیر اعلیٰ کے سدارامیا نے جائزہ لیا، انہوں نے دیکھا کہ ان تہواروں کے وقت نظم وضبط، امن اور ہم آہنگی کی برقراری کے لئے کس طرح کے انتظامات کئے جارہے ہیں، گنیش تہوار 25 اگست کو منایا جارہا ہے، جبکہ بقرعید کے2 ستمبر کو ہے، لیکن گنیش کی مورتی کو بٹھانا اور اس کاوسرجن ایک ایک سے لے کر15 دن تک چلتے رہتے ہیں، ڈائرکٹر جنرل اینڈ انسپکٹر جنرل آف پولیس( ڈی آئی، آئی جی پی) اس اجلاس میں موجود تھے، اور انہوں نے اپنے اپنے منصوبوں کو پیش کیا، جلسہ میں شریک ایک آئی جی پی نے کہا، وزیر اعلیٰ نے جو وزارت داخلہ کا قلم دان بھی رکھتے ہیں، ان انٹلی جنس اطلاعات کے بعد کہ تہواروں کے دوران کچھ مفاد پرست افراد تشدد پھیلاسکتے ہیں۔اپنی صدارت میں اجلاس منعقد کرنے کا فیصلہ کیا، وہ کسی بھی ناخوشگوار واقعہ کو روکنے کے لئے حفاظتی انتظامات کی پیش رفت کا جائزہ لینا چاہتے تھے، خاص طور پر حساس علاقوں کی صورتحال اور وہاں افزود دستوں کی تعیناتی کے بارے میں بھی انہیں معلومات درکار تھیں، اس موقع پر ساحلی علاقوں، بلگاوی، ہبلی، باگلکوٹ اور وجئے پورہ میں حفاظتی صورتحال پر تفصیلی گفتگو کی گئی، ان علاقوں میں عام طور پر گنیش تہوار کے موقع پر فرقہ وارانہ جھڑپیں ہوتی ہیں، وزیر اعلیٰ نے افسروں کو ہدایت دی کہ قانون ہاتھ میں لینے کی کوشش کرنے والے افراد کے خلاف سخت کارروائی کریں، انہوں نے پولیس افسروں سے بھی کہا کہ بے حد چوکس رہیں اور وارننگ دی کہ اگر کوئی فرقہ وارانہ فساد ہوا تو ان کے خلاف بھی کارروائی کی جائے گی، اعلیٰ پولیس افسروں کو سدارامیا نے یہ ہدایت بھی دی کہ وہ خود نگرانی کریں، اور حساس علاقوں کا دورہ کرتے ہوئے حالات پر نظر رکھیں، اسی دوران محکمہ پولیس نے غنڈوں اور سماج دشمن عناصر کو گرفتار کرنے کا فیصلہ کیا ہے، تاکہ تشدد پھیلانے کی کوششوں کو ختم کیا جاسکے، مذکورہ پولیس افسر نے کہا کہ غنڈے اور سماج دشمن عناصر تشدد اور افواہیں پھیلانے میں کنٹریکٹروں کی حیثیت سے کام کرنے ہیں، تاکہ ان کے اپنے مفادات پورے ہوں، ایسے ہی لوگوں نے گزشتہ دنوں افواہیں پھیلائی تھی کہ ریاستی حکومت منتظمین گنیش پنڈالس لگانے کے لئے10 لاکھ روپئے جمع کرنے کے لئے کہہ رہی ہے۔