کونسل کیلئے سی ایم لنگپا کا نام دوبارہ پیش ہوگا
بنگلورو:18/مئی(ایس او نیوز) ریاستی لیجسلیٹیو کونسل کی رکنیت کیلئے رام نگرم کے سابق رکن اسمبلی سی ایم لنگپا کے نام کو منظوری دینے سے گورنر واجو بھائی والا کے انکار کے بعد ریاستی حکومت ایک بار پھر ان کے نام کی سفارش کرنے پر سنجیدگی سے غور کررہی ہے۔کل گورنرنے ریاستی حکومت کی طرف سے تجویز کئے گئے دو ناموں کو منظور کرتے ہوئے سی ایم لنگپا کے نام کو تعلیمی زمرہ کیلئے ناقابل غور قرار دیتے ہوئے مسترد کردیا۔ گورنر کے اس فیصلے کے بعد آج ریاستی حکومت کی طرف سے ایک بار پھر یہ کوشش تیز ہوگئی کہ دوبارہ ایوان بالا کی رکنیت کیلئے سی ایم لنگپا کے نام کی سفارش کی جائے۔ یاد رہے کہ اس پہلے بی جے پی کے دور اقتدار میں اس وقت کے ایچ آر بھردواج نے کونسل کی رکنیت کیلئے تعلیمی زمرے سے وی سومنا کے نام کو مسترد کردیاتھا۔ اسی طریقہئ کار کو اپناتے ہوئے موجودہ گورنر نے رام نگرم کے سابق رکن اسمبلی سی ایم لنگپا کے نام کی سفارش کو ماننے سے انکار کیا ہے۔