کرناٹکا میں سیلاب اور بارش سے مچی تباہ کاریوں کی رپورٹ پیش کرنے وزیراعظم مودی نے دی ہدایت؛ سیلاب متاثرین سے کی اظہار ہمدردی
بنگلورو،20؍اگست(ایس او نیوز) ریاست میں سیلاب اور بارش کی صورتحال سے متاثر کورگ ، ہاسن ، چکمگلور اور ساحلی کرناٹک کے مختلف علاقوں میں مچی تباہی جانی ومالی نقصان اور دیگر تمام تفصیلات یکجا کرکے رپورٹ پیش کرنے وزیراعظم نریندر مودی نے کرناٹک کے اراکین پارلیمان کو ہدایت دی ہے۔
انہوں نے کہا ہے کہ مرکزی حکومت کی طرف سے ریاست کے سیلاب متاثرین کو ہر ممکنہ مدد فراہم کی جائے گی۔وزیر اعظم نے اپنے ٹیوٹر پیغام میں کرناٹک میں سیلاب کے متاثرین سے اپنی ہمدردی کا اظہار کرتے ہوئے کہا ہے کہ ریاست کے سیلاب متاثرین کی مدد کے لئے وزیر اعلیٰ ریلیف فنڈ میں فوری طور پر امدادی رقم جمع کی جائے۔ اس دوران آج کورگ میں چیف سکریٹری ٹی ایم وجئے بھاسکر نے کورگ ، منگلور ، دکشن کنڑا اور شیموگہ اضلاع میں سیلاب کی صورتحال کا ڈپٹی کمشنروں کے ساتھ جائزہ لیا اور یہاں راحت کاری کے لئے درکار اقدامات کی جانکاری حاصل کی ۔
ویڈیو کانفرنس کے ذریعے لئے گئے جائزے کے دوران چیف سکریٹری نے تمام اضلاع میں تباہی کے متعلق حکومت کی طرف سے تیار کئے گئے تخمینے حاصل کئے، اور یقین دلایا کہ حکومت کی طرف سے راحت کاری کے کاموں میں غیر معمولی تیزی لائی جائے گی۔ ویڈیو کانفرنس میں محکمۂ مالگزاری کے پرنسپل سکریٹری گنگا رام بڈیریا ، محکمۂ توانائی کے اڈیشنل چیف سکریٹری روی کمار ، وزیر اعلیٰ کے پرنسپل سکریٹری سیلوا کمار وغیرہ موجود تھے۔
