بنگلورو23؍اگست(ایس او نیوز)ریاست کے چیف سکریٹری اروند جادھو کے اراضی گھپلے میں ملوث ہونے کے الزامات کے پیش نظر وزیر اعلیٰ سدرامیا نے محکمۂ مالگذاری کو سخت ہدایت جاری کی ہے کہ جادھو کے خلاف جو بھی الزامات ہیں ان کی جانچ کی جائے۔آج اپنی ہوم آفس کرشنا میں اخباری نمائندوں سے بات چیت کرتے ہوئے انہوں نے کہاکہ ان الزامات کے تعلق سے تمام تفصیلات پیش کرنے انہوں نے چیف سکریٹری کو ہدایت نہیں دی ہے بلکہ ان کے خلاف تحقیقات کرنے محکمۂ مالگذاری کو حکم دیاہے۔ ڈائرکٹر جنرل آف پولیس اوم پرکاش کے فرزند کارتک کی ہراسانی سے تنگ آکر ایک کسان کی خود کشی کے متعلق الزامات پر سدرامیا نے کہاکہ اس کے بارے میں تفصیلات ان کے علم میں نہیں ہیں۔ ڈی جی پی کے فرزند کی طرف سے زمین ہڑپنے اور گرینیڈ کی تجارت کرنے کیلئے مسلسل ہراسانی کی شکایت کرتے ہوئے ماگڑی کے ایک کسان کی طرف سے خود کشی کا معاملہ اخباری نمائندوں کی طرف سے اٹھائے جانے پر وزیراعلیٰ نے یہی دہرایا کہ اس کے بارے میں انہیں کچھ پتہ نہیں ہے، تفصیلات موصول ہونے پر وہ اس بارے میں اپنا موقف ظاہر کریں گے۔ ریوو اولمپک میں شریک کرناٹک کی ایک اتھیلیٹ سدھا سنگھ کو مہلک بیماری زیکا لاحق ہوجانے اور انہیں شہر کی ایک نجی اسپتال میں داخل کئے جانے کی رپورٹوں پر وزیر اعلیٰ نے کہاکہ سدھا سنگھ کا مکمل علاج سرکاری خرچ پر کیا جائے گا۔ انہوں نے اپنے سکریٹری گووند راجو کو ہدایت دی کہ فوری طور پر وہ اسپتال پہنچیں اور سدھا سنگھ کی عیادت کرتے ہوئے علاج کے خرچ کے متعلق تمام انتظامات سرکاری طور پر کریں۔