بنگلورو،5؍اکتوبر(ایس او نیوز) معروف فلم اداکار پرکاش راج نے کہا ہے کہ اگلے لوک سبھا انتخابات کے بعد مرکز میں اقتدار کسے ملے گا یہ فیصلہ ملک کے عوام کریں گے ، نہ کہ میڈیا کے کچھ چینل ، انہوں نے کہاکہ میڈیا کے بعض چینلوں کی طرف سے کروائے گئے سروے میں یہ فیصلہ کہ وزیراعظم مودی ملک کے اقتدار پر برقرار رہیں گے قابل اعتبار نہیں ہے۔آج میسور میں ایک اخبار ی کانفرنس سے خطاب کرتے ہوئے انہوں نے کچھ میڈیا گھرانوں کو آڑے ہاتھوں لیا اور کہاکہ یہ اپنے فائدے کے لئے برسر اقتدار طبقے کے غلام بن چکے ہیں یہی وجہ ہے کہ فرضی سروے کروا کر یہ دعویٰ کررہے ہیں کہ مودی پھر وزیراعظم بنیں گے ، ان فرضی سروے کے نتائج پر اعتبار کس حد تک کیا جاسکتا ہے ؟۔ انہوں نے کہاکہ ان میڈیا چینلوں نے اپنی ٹی آر پی بڑھانے کے لئے اس طرح کا سروے کروایا ہے۔ حقائق کا اگر جائزہ لیا جائے تو ایسے کوئی اعداد وشمار سامنے نہیں آتے ۔ پرکاش راج نے کہاکہ ملک کے عوام اگر چاہتے ہیں کہ مودی ہی اقتدار پر رہیں تو رہیں ، لیکن میڈیا کی طرف سے انتخابات سے پہلے ہی عوام کے ذہنوں و موڑنے کی جو کوشش منظم طریقے سے کی جارہی ہے وہ قابل مذمت ہے۔ انہوں نے کہا کہ میڈیا کا یہ دعویٰ بے بنیاد ہے کہ ملک کے 95 فیصد عوام مودی کے ساتھ ہیں۔ پچھلے لوک سبھا انتخابات میں مودی کو صرف 31فیصد ووٹ ملے تھے باقی تمام جماعتیں جو بکھری ہوئی تھیں انہیں 69فیصد ووٹ ملے ، ان جماعتوں میں انتشار کا فائدہ اٹھاکر مودی نے اقتدار پر قبضہ جما لیا، کیا یہ 69 فیصد گھٹ کر اب پانچ فیصد ہوگئے ہیں؟ انہوں نے کہاکہ میڈیا کو اپنے اعداد وشمار پیش کرنے میں حقیقت پسندی سے کام لینا چاہئے۔ پرکاش راج نے کہاکہ وہ سیاست دان ہیں اور نہ کسی سیاسی جماعت سے ان کی کوئی دلچسپی ہے، آئین کے دائرے میں سماج کو بیدار کرنے کا کام کرنے میں لگے ہوئے ہیں۔