کسانوں کے مسائل سلجھانے میں مرکزی اور ریاستی حکومتیں ناکام: کمار سوامی
بنگلورو،27؍فروری(ایس او نیوز)سابق وزیراعلیٰ اور ریاستی جنتادل (ایس) صدر ایچ ڈی کمار سوامی نے کہاکہ ریاستی اور مرکزی حکومتیں کسانوں کے مفادات کو نظر انداز کرچکی ہیں ۔اخباری نمائندوں سے بات چیت کرتے ہوئے کمار سوامی نے کہاکہ ریاست میں کسانوں کو درپیش مسائل سے نمٹنے میں سدرامیا حکومت جہاں بر ی طرح ناکام رہی ہے تو دوسری طرف مرکزی حکومت بھی ریاست کے کسانوں کی طرف توجہ دینے میں کوئی دلچسپی نہیں دکھا رہی ہے۔ انہوں نے کہاکہ ریاست کے اہم سلگتے مسائل اور آبی تنازعات کو سلجھانے میں مرکز کی عدم دلچسپی کی وجہ سے کسان طبقہ بری طرح متاثر ہوگیا ہے۔ انہوں نے کہاکہ ریاست میں خشک سالی سے متاثرکسانوں کی مدد کا جب بھی مرحلہ آتا ہے تو مرکزی حکومت کا خزانہ خالی ہوجاتا ہے، دوسری طرف کسانوں کی مدد کی بجائے ریاستی حکومت مرکزی حکومت پر الزام لگاکر اپنا دامن بچانے کی کوشش کرتی ہے۔ انہوں نے کہاکہ کسانوں کو منصفانہ طور پر خشک سالی سے نجات دلانے کیلئے جو معاوضہ ملتا ہے اسے دلال ہڑپ کرجاتے ہیں۔ فوری طور پر اس سلسلے پر روک لگانے کی ضرورت ہے۔ کمار سوامی نے کہاکہ جب تک کانگریس اور بی جے پی ریاست کے اقتدار کو آپس میں تقسیم کرتے رہیں گے اس وقت تک ریاست کے کسان اور غرباء کا بھلا ہونے والا نہیں ہے۔ان دونوں سیاسی پارٹیوں کو اپنے اپنے مفادات اور اپنے آقاؤں کو خوش کرنے کے علاوہ کسی کی مصیبتوں سے کچھ سروکار نہیں ہے۔خشک سالی کی وجہ سے ریاست کا کسان مشکلات میں گھرا ہوا ہے، رواں سال چالیس سال کی بدترین خشک سالی کی صورتحال ریاست کو درپیش ہے۔ان حالات میں ریاستی حکومت کسانوں کے قرضہ جات معاف کرنے کی بجائے مرکزی حکومت پر تکیہ کئے ہوئے ہے۔ کمار سوامی نے ریاستی حکومت کو مشورہ دیا کہ وہ مرکزی حکومت پر انحصار کئے بغیر اپنے طور پر کوآپریٹیو اداروں سے کسانوں کی طرف سے لئے گئے قرضہ جات معاف کردے۔ اس کے بعد مرکزی حکومت قومی بینکوں سے لئے گئے قرضہ جات معاف کرنے کیلئے کارروائی کرے گی تو اس سے کسانوں کا بھلا ہوگا۔