وزیراعظم پر نکتہ چینی۔اداکار پرکاش راج کے خلاف سوشل میڈیا کی مہم ،ترقی پسند مفکرین کامظاہرہ
بنگلورو،4اکتوبر(ایس او نیوز؍عبدالحلیم منصور) اداکار پرکاش راج کے خلاف سوشل میڈیا پر سنگھ پریوار اور بی جے پی کے کارکنوں کی جانب سے قابل اعتراض مواد پوسٹ کرنے کے خلاف ترقی پسند مفکرین و مصنفین اور جہد کاروں نے بنگلورو میں ٹاون ہال کے روبرو مظاہرہ کیا۔مصنف ڈاکٹر وجے نے کہا '' عوام نے مودی پر بھروسہ کرتے ہوئے انہیں وزیراعظم کے طور پر منتخب کیا۔ عوام ان سے سوال کریں گے اور پرکاش نے بھی ایسا ہی کیا ہے ۔ اس کا جواب دینا وزیراعظم کا فرض ہے ۔اس کے بجائے سوال کرنے والوں کو برا بھلا کہنا اور ان کو نشانہ بنانا بزدلی ہے ۔مفکر جی این ناگراج نے کہا '' جمہوریت میں ہر کسی کو سوال کرنے کا حق ہے ۔یہ کہاں لکھا ہے کہ وزیراعظم سے سوال نہیں کیا جاسکتا۔ پرکاش راج نے اپنی رائے ظاہر کی ہے ۔ سنگھ پریوار اور بی جے پی سوال کرنے والوں کو خاموش کرانے کی کوشش کررہے ہیں۔ رکن پارلیمنٹ پرتاپ سمہا ' پرکاش راج کی نجی زندگی پر اظہار خیال کررہے ہیں جو نامناسب ہے ۔ڈی وائی ایف آئی اور ایس ایف آئی کے ارکان نے بھی سوشل میڈیا پر پرکاش راج سے سنگھ پریوار اور بی جے پی کی بدکلامی کے خلاف بنگلورو میں احتجاج کیا۔ڈی وائی ایف آئی کے صدر منیر کٹی پالا نے کہا ''پرکاش راج نے گؤری کے قتل کے خلاف حقیقت کا اظہار کرتے ہوئے مناسب شخص سے سوال کیا۔ تاہم ان کا جواب دینے کے بجائے اداکار سے بدکلامی کی جارہی ہے ۔کنڑ کی سینئر ایڈیٹر و جہاد کار گؤری لنکیش کے قتل پر وزیراعظم کی خاموشی پرنکتہ چینی کرتے ہوئے جنوبی ہند کے مشہور اداکار پرکاش راج نے یکم اکتوبر کو کہا تھا کہ یہ مایوس کن بات ہے کہ وزیراعظم سوشل میڈیا پر گؤری لنکیش کے قتل کا جشن منانے والوں کی تقلید کررہے ہیں۔پرکاش راج نے بنگلورو میں ڈیموکریٹک یوتھ فیڈریشن آف انڈیا(ڈی وائی ایف آئی ) کے اجلاس سے خطاب کرتے ہوئے اتوار کو کہا تھا '' گؤری لنکیش کے قاتل ہنوز نہیں پکڑے گئے ہیں۔تاہم مایوس کن بات یہ ہے کہ لوگ اس قتل پر سوشیل میڈیا پر جشن منارہے ہیں اور منافرت پھیلارہے ہیں۔ بعض افراد جو گؤری کے قتل کا جشن منارہے ہیں ' کی تقلید ٹوئیٹر پر ہمارے وزیراعظم کررہے ہیں۔ہمارے پاس ایک ایسے وزیراعظم ہیں جو آنکھیں بند کئے ہوئے ہیں۔ کنڑ 'تلگو ' ٹامل اور ہندی فلم انڈسٹری کے مشہور اداکار پرکاش راج کوان کی فلمو ں پر 5فلم فیر ایوارڈس حاصل ہوئے ہیں۔