بنگلورو،23؍اگست(ایس او نیوز) برہت بنگلور مہانگر پالیکے نے طے کیا ہے کہ شہر بھر میں بڑے نالوں سے قریب بفر زون میں تعمیر شدہ غیر قانونی عمارتوں کو منہدم کرنے کا سلسلہ اگلے ہفتے سے شروع کردیا جائے۔ شہر بھر میں جابجا بڑے نالوں پر غیر قانونی قبضوں کے سروے کی رپورٹ میئر سمپت راج کو پیش کی جاچکی ہے۔

اس رپورٹ کے سلسلے میں نائب وزیر اعلیٰ ڈاکٹر جی پرمیشور کے ساتھ جلد ہی میٹنگ کا اہتمام کیا جائے گا۔ میٹنگ میں بڑے نالوں پر غیر قانونی قبضے ختم کرنے کے لئے انہدامی مہم کی شروعات کی تاریخ کا تعین بھی کردیا جائے گا۔پرمیشور جن کے پاس ترقیات بنگلور کا قلمدان بھی ہے، انہوں نے قلمدان سنبھالتے ہی وعدہ کیا تھاکہ بڑے نالوں پر جتنے بھی غیر قانونی قبضے ہوں انہیں بلامروت خالی کرایا جائے گا۔ حالانکہ یہ مہم ایک ماہ پہلے ہی شروع ہونی چاہئے تھی، لیکن رپورٹ ملنے کے بعد اسے اب شروع کرنے پر غور کیا جارہاہے، کہاجارہا ہے کہ شہر بنگلور میں ڈرینج کے ناقص انتظام کی وجہ سے شہر ایک معمولی بارش کو برداشت نہیں کرپارہاہے۔

ماہرین کا کہنا ہے کہ حال ہی میں کورگ ضلع میں جو بارش ہوئی ہے اس کااگر دسواں حصہ بھی بنگلور پر برسے تو بنگلور مکمل طور پر غرقاب ہوجائے گا۔ ایسی صورتحال رونما ہونے نہ پائے اور شہر کے ڈرینج نظام کو صاف ستھرا رکھا جائے ، اسی مقصد کے تحت بڑے نالوں پر غیر قانونی قبضے ہٹانے کی مہم شروع کی جارہی ہے۔ترجیحی بنیاد پر کارروائی کا آغاز ان علاقوں سے کیا جائے گا جو نشیبی ہیں اور آئے دن بارش کی وجہ سے زیر آب ہوتے رہتے ہیں۔