بنگلورو،14؍نومبر(ایس او نیوز) نائب وزیراعلیٰ ڈاکٹر جی پرمیشور نے اشارہ دیا ہے کہ ریاستی کابینہ میں توسیع اور ردوبدل بہت جلد کی جا ئے گی۔آج ٹمکور میں کانگریس دفتر میں ملک کے پہلے وزیراعظم جواہر لال نہرو کے جنم دن کی تقریبات میں حصہ لینے کے بعد اخباری نمائندوں سے بات چیت کرتے ہوئے نائب وزیراعلیٰ نے کہاکہ کابینہ میں توسیع کا عمل جاری ہے۔ عنقریب اسے قطعیت دی جائے گی۔ انہوں نے کہاکہ پہلے ہی کہا جاچکا ہے کہ دیوالی تہوار کے بعد کابینہ میں توسیع کی جائے گی، اسی کے مطابق کانگریس اور جے ڈی ایس قیادت کام کررہی ہے۔ سابق وزیر جناردھن ریڈی کی طرف سے ایک فراڈ کمپنی کی مدد کے بارے میں سوالات پر ڈاکٹر پرمیشور نے کہاکہ یہ معاملہ عدالت میں ہے اسی لئے اس پر کوئی تبصرہ نہیں کیا جاسکتا ۔ سی سی بی عہدیدار اس سلسلے میں عدالت کو شواہد مہیا کرارہے ہیں۔ کورگ میں ٹیپو سلطان کے متعلق توہین آمیز بیان دینے پر ایک صحافی کی گرفتاری کے بارے میں ڈاکٹر پرمیشور نے کہاکہ ٹیپو جینتی ایک سرکاری پروگرام تھا، اس کی مخالفت کرتے ہوئے اگر سماج میں بدامنی پھیلانے کی کوشش کی جائے تو کیا پولیس کو خاموش رہنا چاہئے؟ انہوں نے کہاکہ ریاستی حکومت نے کبھی ہندو طبقے کو نشانہ نہیں بنایا، غلطی کسی نے بھی کی ہو وہ غلطی ہی ہے، لیکن کچھ لوگ ایسے حساس معاملوں کا غلط فائدہ اٹھاتے ہوئے اپنی غلطیوں پر مذہبی پردہ پوشی کی کوشش کرتے ہیں۔انہوں نے کہاکہ سماج میں انتشار پھیلانے کے مقصد سے جس نے بھی اشتعال انگیز بیان دیا اس کے خلاف کارروائی کی گئی ہے، ایسے معاملوں میں پولیس خاموش نہیں رہ سکتی، صحافی کی گرفتاری کے خلاف کورگ بند منانے کے اعلان پر ڈاکٹر پرمیشور نے کہاکہ ضلع میں صورتحال کی سخت نگرانی کی جارہی ہے، پولیس کو ہدایت دی گئی ہے کہ امن کو متاثر کرنے کی کسی بھی کوشش کو سختی سے کچلا جائے۔ اس موقع پر رکن پارلیمان مدو ہنومے گوڈا ، سابق اراکین اسمبلی ڈاکٹر رفیق احمد، شفیع احمد ، ضلع کانگریس صدر رام کرشنا اور دیگر کانگریس عہدار وغیرہ موجود تھے۔