بنگلورو،24؍اکتوبر(ایس او نیوز) پچھلے دنوں ودھان سودھا کے احاطہ میں ایک وکیل کی کار سے ضبط شدہ دو کروڑ روپیوں کی رقم کے متعلق سابق وزیراعلیٰ اور ریاستی جنتادل (ایس) صدر ایچ ڈی کمار سوامی نے آج یہ کہہ کر ریاست کے سیاسی حلقوں میں ہلچل مچادی کہ یہ رقم کس کی تھی اور کس کیلئے تھی ؟ اس سے سابق وزیراعلیٰ اور ریاستی بی جے پی صدر بی ایس یڈیورپا بخوبی واقف ہیں۔ آج اخباری نمائندوں سے بات چیت کرتے ہوئے کمار سوامی نے کہاکہ یڈیورپا نے اسی لئے تحقیقات ہونے سے پہلے ہی یہ دعویٰ کردیا کہ یہ رقم ایک ریاستی وزیر کیلئے تھی۔ یڈیورپا کے اس بیان پر ردعمل ظاہر کرتے ہوئے انہوں نے کہاکہ اس رقم کے بارے میں مکمل جانکاری یڈیورپا کو ہے۔انہیں یہ جانکاری منظر عام پر لانی ہوگی۔ انہوں نے کہاکہ یڈیورپا کا یہ بیان کہ یہ رقم کسی وزیر کو دینے کیلئے لائی گئی تھی ،تحقیقات کا حصہ بنناچاہئے۔ یڈیورپا نے اس طرح کا بیان دیا گویا کہ وہ سب کچھ جانتے ہیں۔ اسی لئے پولیس کو اس معاملہ کی جانچ میں ان کی مدد حاصل کرنی چاہئے۔ ریاستی وزارت سے برطرفی کے بعد اسمبلی کی رکنیت اور کانگریس پارٹی کو خیر باد کہنے والے وی سرینواس پرساد کی بھرپور حمایت کرتے ہوئے کمار سوامی نے کہاکہ وی سرینواس پرساد نے اگر اپنے ننجنگڈھ حلقہ سے بحیثیت آزاد امیدوار بھی چناؤ کا سامنا کیا تو جنتادل (ایس) ان کے مقابلے میں اپنا امیدوار کھڑا نہیں کرے گی۔ ساتھ ہی سرینواس پرساد کو جنتادل (ایس) میں مدعو کرنے کیلئے بات چیت بھی ہوگی۔ انہوں نے کہاکہ سرینواس پرساد ایک سنجیدہ سیاستدان ہیں۔ وزیراعلیٰ سدرامیا کو ان پر نکتہ چینی کرنے کا کوئی حق نہیں ہے۔ کرناٹک میں کنڑا فلم انڈسٹری کو مضبوط کرنے کے سلسلے میں ریاستی حکومت کو ایک سخت قانون کا مشورہ دیتے ہوئے انہوں نے کہاکہ ریاست میں غیر کنڑا فلموں پر کنٹرول نہ لگایا گیا تو کنڑا فلموں کو فروغ ملنا مشکل ہے۔ کنڑا زبان اور فلموں کے مفاد کو ذہن میں رکھ کر حکومت کو اس سلسلے میں واضح پالیسی اپنانی ہوگی۔ انہوں نے کہاکہ ریاست میں غیر کنڑا فلموں کی نمائش کے متعلق ہائی کورٹ میں درج نظر ثانی کی عرضی میں ریاستی حکومت کو فریق بنایا جائے اور اس سلسلے میں حکومت کا موقف عدالت کے ذریعہ معلوم کیا جائے۔ کرناٹکا میں غیر کنڑا فلموں پر روک لگانے کیلئے کنڑا فلم انڈسٹری کو مستعد ہونے کا مشورہ دیتے ہوئے انہوں نے کہاکہ اس سلسلے میں جو قانونی جنگ جاری ہے اس کو بھی پوری توجہ کے ساتھ آگے بڑھایا جانا چاہئے۔ اس موقع پر کنڑا فلم چیمبر آف کامرس کے چیرمین سارا گووند اور دیگر فلم ساز موجود تھے۔