پٹنہ، 17؍جون (ایس او نیوز؍آئی این ا یس انڈیا )آر جے ڈی سربراہ لالو پرساد یادو کے خاندان کی مشکلیں مسلسل بڑھتی ہی جا رہی ہیں،اب ان کے وزیر بیٹے تیج پرتاپ یادو کے پٹرول پمپ کا لائسنس بھارت پٹرولیم کارپوریشن لمیٹڈ نے منسوخ کر دیاہے ، جس کے بعد تیج پرتاپ نے لائسنس منسوخ کئے جانے کو عدالت میں چیلنج کیا، جس پر انہیں اسٹے مل گیا ہے، اس معاملے پر اگلے ہفتے سماعت ہوگی۔اس مہینے تیج پرتاپ کو غلط طریقے سے لائسنس لینے کے الزامات کے بعد نوٹس جاری کیا گیا تھا۔تیج پرتاپ کو پٹنہ کے بے اور جیل کے پاس پٹرول پمپ الاٹ کیا گیا تھا، جس پر بہار بی جے پی کے لیڈر سشیل مودی نے الزام لگایا تھا کہ 2011میں پٹنہ میں پٹرول پمپ کا لائسنس لینے کے لیے تیج پرتاپ نے فرضی کاغذات دکھائے تھے۔ساتھ ہی الزام لگایا تھا کہ انہوں نے تیل کمپنی کے ایک اہلکار سے ساٹھ گانٹھ کرکے غلط طریقے سے پٹرول پمپ کا لائسنس لیاتھا۔بی جے پی لیڈر سشیل کمار مودی نے کہا پہلے تیج پرتاپ کے پاس زمین نہیں تھی،کسی اور کی زمین کو اپنے نام پر دکھا کر پٹرول پمپ الاٹمنٹ لیا ،کسی نے اس کی شکایت کی ہے تو ہم نے بھی یہ مسئلہ اٹھایاہے ، ہمیں خوشی ہے کہ بھارت پٹرولیم نے اس کو منسوخ کرنے کا حکم دیا ہے۔وہیں بہار کے نائب وزیر اعلی تیجسوی یادو نے کہا کہ ہم قانونی معاملے پر کچھ نہیں کہیں گے،یہ سیاسی سازش ہے، لیکن ان کی اس سازش سے ہماری پارٹی مضبوط ہوگی۔غورطلب ہے کہ پٹنہ کے مصروف علاقوں میں سے ایک بے اور جیل کے پاس تیج پرتاپ یادو کو پٹرول پمپ الاٹ کیا گیا تھا۔میڈیا میں کافی ہنگامہ ہونے کے بعد بی پی سی ایل کی طرف سے بہار کے وزیر صحت تیج پرتاپ کو نوٹس جاری کر کے 15دنوں میں جواب دینے کی ہدایت دی گئی تھی۔اس سے پہلے بھی تیج پرتاپ یادو تنازعات میں رہ چکے ہیں،اپنے والد لالو کے لیے گھر میں ہی سرکاری اسپتا ل کے تین ڈاکٹروں اور نرسوں کی ٹیم کی ڈیوٹی پر لگانے کو لے کر بھی کافی تنازعہ ہوا تھا۔