بورڈز اور کارپوریشن چیرمینوں کی فہرست کانگریس اعلیٰ کمان کو پیش
بنگلورو،24؍اکتوبر(ایس او نیوز) وزیر اعلیٰ سدرامیا نے سرکاری بورڈز اور کارپوریشنوں کیلئے چیرمینوں کی فہرست آج کانگریس اعلیٰ کمان کو سونپ دی۔اعلیٰ کمان کی منظوری کے فوراً بعد بورڈز اور کارپوریشنوں کیلئے چیرمینوں کا تقرر عمل میں آئے گا۔ آج دہلی میں کانگریس نائب صدر راہول گاندھی سے ملاقات کے بعد وزیر اعلیٰ سدرامیا نے کہاکہ انہوں نے پارٹی کی طرف سے تیار شدہ چیرمینوں کی فہرست راہول گاندھی کو سونپ دی ہے، جیسے ہی منظوری ملے گی چیرمینوں کا تقرر کردیا جائے گا۔انہوں نے بتایا کہ ریاستی لیجسلیٹیو کونسل کیلئے نامزدگیوں کے معاملے پر بھی راہول گاندھی سے بات چیت ہوئی ہے۔ ان کی طرف سے جن ناموں کو منظوری دی جائے گی، ان کو کونسل کی رکنیت دے دی جائے گی۔ اس دوران وزیر اعلیٰ سدرامیا نے آج کے پی سی سی صدر اور وزیر داخلہ ڈاکٹر جی پرمیشور اور کے پی سی سی کارگذار صدر دنیش گنڈو راؤ کے ہمراہ کانگریس اعلیٰ کمان کے قائدین سے ملاقاتوں کا سلسلہ جاری رکھا۔سرکاری بورڈز اور کارپوریشنوں کیلئے تقررات میں تاخیر کی وجہ سے انہوں نے فوری طور پر ان تقررات کو قطعیت دینے پرزوردیا۔ سدرامیا نے پہلے ہی اعلان کیا ہے کہ دیوالی تہوار تک بورڈز اور کارپوریشنوں کیلئے چیرمینوں کا تقرر کردیا جائے گا۔ ریاستی لجسلیٹیو کونسل کی تین مخلوعہ نشستوں پر نامزدگیوں کے سلسلے میں بھی سدرامیا اور پرمیشور نے آج اے آئی سی سی جنرل سکریٹری انچارج کرناٹک ڈگ وجئے سنگھ اور دیگر لیڈروں سے بات چیت کی۔ بتایاجاتاہے کہ سدرامیا کے بنگلور لوٹتے ہی بورڈز اور کارپوریشنوں کیلئے چیرمینوں کے تقرر کو مکمل کرلیا جائے گا۔