عدالت کی لتاڑ کے بعد بی بی ایم پی نے ایک رات میں871گڈھوں کو بند کردیا
بنگلورو،20؍ستمبر(ایس او نیوز) شہر میں سڑکوں کی خستہ حالی پر ہائی کورٹ کی سخت لتاڑ کے بعد بی بی ایم پی نے دیر رات سے شہر کی اہم سڑکوں کے گڈھوں کو بند کرنے کا کام شروع کردیا۔ کے آر سرکل ، چالوکیہ سرکل ، کاٹن پیٹ ، پیالیس روڈ اور دیگر مقامات پر سڑکوں کے گڈھے بند کرنے کے لئے خریدی گئی نئی مشینوں کی مدد سے کام آگے بڑھایا گیا ہے۔ ہائی کورٹ کی طرف سے یہ ہدایت دی گئی تھی کہ آج سماعت سے قبل سڑکوں کے گڈھوں کو بند کرنے کا کام پورا ہوجانا چاہئے۔ اس دوران سڑکوں کی مرمت کے لئے جس طرح کاکام کیاجارہاتھا اس سے راہگیروں نے گھٹیا قرار دیتے ہوئے کہا کہ اگر اس معیار کی مرمت ہوئی تو اگلی بارش کے بعد سڑکوں کی حالت اور بدتر ہوجائے گی۔ اس دوران کہا جارہے کہ نائب وزیر اعلیٰ اور بنگلور ضلع انچارج ڈاکٹر جی پرمیشور نے وعدہ کیا تھاکہ دو ہفتوں کے اندر سڑکوں کی مرمت کاکام پورا کرلیا جائے گا لیکن کہا جارہاہے کہ کارپوریٹر اور بی بی ایم پی کے افسروں نے اس معاملے میں نائب وزیراعلیٰ کو گمراہ کرنے کی کوشش کررہے ہیں۔ یہ بھی الزام لگایا جارہاہے کہ بی بی ایم پی افسروں نے سڑکوں کی مرمت کے لئے خریدی گئی امریکی مشین سے زیادہ کام نہیں لیا اور اس پر آٹھ کروڑ روپے خرچ کردئے۔یہ الزام لگایا جارہاہے کہ ان مشینوں کی خریداری میں بھاری ہیرا پھیری ہوئی ہے، اس دوران بی بی ایم پی کی طرف سے عدالت کو بتایا گیا کہ رات بھر کی گئی مرمت کے دوران 871 گڈھوں کو بند کردیاگیا ہے۔ یہ بھی بتایا گیا کہ بیسکام ، بی ڈبلیو ایس ایس بی وغیرہ اچھی سڑکوں کی کھدائی کردیتے ہیں۔ مرمت کے کاموں کو جلد از جلد مکمل کرنے کا وعدہ کیاگیا۔