چندی گڑھ / موہالی،11؍ دسمبر (ایس او نیوز؍آئی این ایس انڈیا)کانگریس صدر راہل گاندھی نے دعوی کیا ہے کہ ان کی پارٹی 2019 کے عام انتخابات میں بی جے پی کو اقتدار سے اکھاڑ پھینکیں گے ۔اس دوران راہل نے بی جے پی پر عدلیہ، فوج اور میڈیا کی طرح اداروں کی ساکھ کو کمزور کرنے کا الزام بھی لگایا۔راہل نے کہاکہ ہم بی جے پی کو اس کی جگہ دکھائیں گے اور انتخابات میں ہرائیں گے۔ 2019 میں ہم یقینی بنائیں گے کہ دہلی میں بی جے پی کو اقتدار سے بے دخل کیا جائے۔بی جے پی اور مودی حکومت پر برستے ہوئے کانگریس صدر نے کہا کہ ملک میں خوف کا ایک ماحول بنایا گیا ہے۔انہوں نے الزام لگایا کہ میڈیا کو بھی دبانے کی کوشش کی گئی۔سپریم کورٹ اور فوج کے بہانے مودی حکومت کو گھیرتے ہوئے راہل نے کہاکہ سپریم کورٹ کے جج کھلے طور پر کہہ رہے ہیں کہ انہیں کام کرنے نہیں دیا جا رہا ہے۔فوج کے جنرل کہہ رہے ہیں کہ مودی فوج کا غلط استعمال کر رہے ہیں اور الیکشن کمیشن کو بھی دبایا جا رہا ہے۔کانگریس صدر نے کہاکہ ہم ان اداروں کی حفاظت کے لئے لڑیں گے۔ہم راشٹریہ سویم سیوک سنگھ (آر ایس ایس) اور بی جے پی کے جیسے نہیں ہیں۔انہوں نے کہا کہ مرکز میں حکمراں لوگ میڈیا کو بے روزگاری اور کسانوں کی حالت زار جیسے مسائل نہیں اٹھانے دے رہے ہیں۔سابق وزیر اعظم منموہن سنگھ کی تعریف کرتے ہوئے راہل نے کہا کہ انہوں نے یہ دکھایا کہ کس طرح عاجزی اور احترام کے ساتھ قیادت کیا جاتا ہے۔اس دوران کسانوں اور نوجوانوں کا مسئلہ اٹھاتے ہوئے بھی راہل نے بی جے پی پر حملہ بولا۔کانگریس صدر نے کہاکہ مودی حکومت کسانوں کو بوجھ سمجھتی ہے۔اہم مسئلہ روزگار اور کسانوں کا واجب الادا ہے۔ملک میں غصہ بڑھتا جا رہا ہے۔کسانوں کے مستقبل کی حفاظت کئے بغیر ملک آگے نہیں بڑھ سکتا یہ اظہر من الشمس ہے۔