ریاست کے اقتدار پر بی جے پی کبھی قابض نہیں ہوگی: کانگریس
بنگلورو،19؍مئی(ایس او نیوز) ریاست میں بی جے پی کی پانچ سالہ حکومت اور اس مدت میں تین وزرائے اعلیٰ کی تبدیلی اور بارہا سیاسی عدم استحکام ، انتشار، لاقانونیت اوربدنظمی ریاستی عوام کیلئے ایک برے خواب کی مانند ہے۔ دوبارہ اس طرح کا ڈراؤنا خواب ریاستی عوام دیکھنا نہیں چاہیں گے۔ یہ بات آج کے پی سی سی کے شعبۂ میڈیاکے سربراہ وی آر سدرشن نے کہی۔ ایک اخباری کانفرنس سے خطاب کرتے ہوئے بی جے پی قائدین کی طرف سے خشک سالی سے متاثرہ علاقوں کا دورہ کرنے کے اقدام کی ستائش کرتے ہوئے انہوں نے کہاکہ اس سلسلے میں ریاستی حکومت کے ساتھ ایک مرتبہ تبادلۂ خیال کرکے انہیں یہ پہل کرنی چاہئے تھی، ایسا کرنے کی بجائے جابجا حکومت اور وزراء کی کردار کشی کرنے کیلئے یہ دورہ کرنا فضول ہے۔ انہوں نے کہاکہ مرکز میں برسر اقتدار بی جے پی کے ریاستی قائدین کو چاہئے کہ خشک سالی کے متاثرین کی زیادہ سے زیادہ امداد کیلئے مرکز پر زور دیں۔ ایسا کرنے کی بجائے فرضی اعداد وشمار پیش کرکے عوام کو گمراہ کرنے کی کوشش اگر بی جے پی قائدین کریں گے تو عوام ان کے جھانسے میں آنے والے نہیں ہیں۔ انہوں نے کہاکہ بی جے پی قائدین اپنے آپسی اختلافات پر پردہ پوشی کرنے کیلئے کانگریس حکومت کی کردار کشی پر اتر آئے ہیں ، اسی مقصد کے تحت خشک سالی سے متاثرہ علاقوں کا دورہ کیا جارہاہے۔ اگلے انتخابات میں اقتدار پر قبضہ کرنے بی جے پی لیڈروں کے دعوؤں کو خواب خرگوش قرار دیتے ہوئے سدرشن نے کہا کہ ریاستی عوام کانگریس حکومت سے مطمئن ہیں اور پارٹی کو یقین ہے کہ دوبارہ ریاست کا انتظامیہ کانگریس کے ہاتھوں میں ہی سونپا جائے گا۔ سابق وزیراعلیٰ اور ریاستی جنتادل (ایس) صدر ایچ ڈی کمار سوامی کے خلاف جتنکل کانکنی معاملے کی جانچ کے بارے میں ایک سو ال کا جواب دیتے ہوئے انہوں نے کہاکہ اس معاملے میں کوئی سیاسی مداخلت نہیں ہوئی ہے۔ جو لوگ برسر اقتدار رہ چکے ہیں ان کی طرف سے اس طرح کے الزامات زیب نہیں دیتے۔اس موقع پر کے پی سی سی جنرل سکریٹری ایم سی بھوس راج نے کہاکہ 22؍ مئی سے پانچ دنوں تک بلگاوی ، کلبرگی، میسور، اور بنگلور ڈویژنوں کے اراکین پارلیمان ، اراکین اسمبلی ، ضلع کانگریس صدور ، محاذی تنظیموں کے سربراہوں اور گزشتہ انتخابات میں ناکام ہونے والے امیدواروں کے ساتھ پارٹی کو منظم کرنے کے سلسلے میں وزیر اعلیٰ سدرامیا، کے پی سی سی صدر ڈاکٹر جی پرمیشور، ریاست میں کانگریس امور کے انچارج وینو گوپال اور دیگر تبادلۂ خیال کریں گے۔
