حج بھون کا نام سابق صدر عبد الکلام کے نام پر رکھنا چاہتی ہے بی جے پی
بنگلورو،25؍جون ( ایس او نیوز؍آئی این ایس انڈیا )میسور ریاست کے 18ویں صدی کے حکمراں ٹیپو سلطان کے نام پر رکھے گئے حج بھون کا نام بدلنے کے منصوبہ پر مخالفت جاری ہے۔ دریں اثنا بی جے پی لیڈر کے جی بوپا نے بنگلورو میں کہا کہ ان کی پارٹی سابق صدر جمہوریہ عبد الکلام کے نام پر حج بھون کا نام رکھنا چاہتی ہے۔بوپیا نے کہا ریاستی صدر بی ایس یدورپا اور تمام دیگر لیڈران چاہتے ہیں کہ حج بھون کا نام ٹیپو سلطان کے بجائے سابق صدرعبد الکلام جی کے نام پر رکھا جانا چاہئے۔تاہم بوپیا کو اس بات کا ڈر بھی ہے کہ اگر کرناٹک حکومت ٹیپو سلطان کے نام پر رکھے گئے حج بھون کا نام بدلے گی تو پوری ریاست میں فرقہ وارانہ تشدد پیدا ہو سکتا ہے۔
قابل غور ہے کہ بنگلورو میں بی جے پی کی رکن پارلیمان شوبھا کارندلاجے نے کہا تھا کہ اگر حج بھون کو ٹیپوسلطان کا نام دیاجاتاہے ، تو اس کے خلاف احتجاج کیاجائیگا ۔ شوبھا کارندلاجے نے یہ بھی کہا تھا کہ حج بھون کی بنیاد سابقہ بی جے پی حکومت میں رکھی گئی تھی۔ اس مقدس جگہ کوعازمین حج کے قیام کیلئے بنایاگیا ہے ، نہ کہ ٹیپوسلطان کا نام دینے کیلئے۔