بنگلورو،7؍اکتوبر(ایس او نیوز) وزیر اعلیٰ سدرامیا نے بی جے پی لیڈر بی جے پٹ سوامی کو متنبہ کیا کہ ان کے فرزند ڈاکٹر یتیندرا پر سرکاری زمین ہڑپنے کے جو بے بنیاد الزامات پٹا سوامی نے عائد کئے ہیں اس کے خلاف ہتک عزت مقدمہ دائر کریں گے۔اخباری نمائندوں سے بات چیت کرتے ہوئے سدرامیا نے کہاکہ بی جے پی کے پٹ سوامی نے ڈاکٹر یتیندرا کے خلاف جو الزامات عائد کئے ہیں وہ بے بنیاد ہیں۔ میسور میں شانتا انڈسٹریز کیلئے منظور شدہ زمین اور ڈاکٹر یتیندرا کا کوئی تعلق نہیں ہے۔ اس کے باوجود بھی بی جے پی کے قائدین جھوٹے الزامات لگاکر یتیندرا کے مستقبل کو خطرہ میں ڈالنے کی کوشش کررہے ہیں۔ سدرامیا نے کہا کہ یتیندرا کو انہوں نے ہدایت دی ہے کہ فوری طور پر پٹ سوامی کے خلاف ہتک عزت مقدمہ دائر کریں اور بی جے پی کے جھوٹ کو عوام کے سامنے لائیں۔ انہوں نے کہاکہ جیسے جیسے اسمبلی انتخابات قریب آرہے ہیں بی جے پی قائدین کی طرف سے بے بنیاد الزامات کا سلسلہ چل پڑا ہے۔ انہوں نے کہاکہ پہلے شوبھا کارندلاجے نے جھوٹا الزام لگایا اور اب پٹ سوامی نے الزامات لگائے ہیں۔ ان بے بنیاد الزامات کو اب برداشت نہیں کیا جائے گا اور ہتک عزت مقدمات دائر کئے جائیں گے۔سابق ریاستی وزیر اور میسور میں بی جے پی کے سرکردہ لیڈر سی ایچ وجئے شنکر کی کانگریس میں شمولیت کے متعلق خبروں سے لاعلمی ظاہر کرتے ہوئے سدرامیا نے کہاکہ اب تک انہوں نے اس سلسلے میں ان سے ملاقات نہیں کی ہے۔ اگر وہ کانگریس میں آنا چاہتے ہیں تو پارٹی میں ان کا استقبال کیا جائے گا۔