بلیا ،17؍جنوری (ایس او نیوز؍آئی این ایس انڈیا)اتر پردیش اسمبلی میں حزب اختلاف کے رہنما رام گووند چودھری نے بی جے پی پر مسلمانوں کے خسارے کا الزام لگاتے ہوئے اعلان کیا ہے کہ سماج وادی پارٹی کی حکومت بننے پر بی جے پی کی طرف سے ختم کی جا رہی ساری سہولیات دوبارہ بحال کی جائے گی۔چودھری نے آج بات چیت کرتے ہوئے مسلمانوں کے حج سبسڈی ختم کرنے کے مرکزی حکومت کے حالیہ فیصلے کو مسلمانوں کا خسارہ قرار دیا ہے۔انہوں نے کہا کہ ملک اور اتر پردیش میں جب سے بھارتیہ جنتا پارٹی کی حکومت بنی ہے، حکومت ایک ایک کرکے مسلمانوں کی تمام سہولیات چھیننے کی کوشش کر رہی ہے۔ایس پی لیڈر نے الزام لگایا کہ بی جے پی حکومت مسلمانوں کو دہشت زدہ کر کے انہیں اپنے حق میں کرنا چاہتی ہے۔انہوں نے کہا کہ حج سبسڈی ختم کرنے کے بعد بی جے پی حکومت اب مدرسوں کو دیے جا رہے گرانٹ کو بھی ختم کرنے کا فیصلہ کر سکتی ہے۔سماج وادی پارٹی مسلمانوں کے ساتھ ہے اور اقتدار میں آنے پر مسلمانوں کی جن خصوصیات کو بی جے پی حکومت نے ختم کیا ہے، ان تمام خصوصیات کو دوبارہ بحال کیا جائے گا۔