شمالی کرناٹک پر کمار سوامی کا بیان احمقانہ: یڈیورپا
بنگلورو،28؍جولائی(ایس او نیوز) ریاستی بی جے پی صدر اور اسمبلی کے اپوزیشن لیڈر بی ایس یڈیورپا نے کہا ہے کہ شمالی کرناٹک کی ترقی کو نظر انداز کرنے کے بعد وزیر اعلیٰ ایچ ڈی کمار سوامی کا یہ بیان کہ شمالی کرناٹک کے عوام نے ان کی پارٹی کو ووٹ نہیں دیا اسی لئے ان علاقوں کو نظر انداز کیا گیاہے، غلط ہے۔
اخباری نمائندوں سے بات چیت کرتے ہوئے یڈیورپا نے کہاکہ وزیراعلیٰ کو اپنایہ بیان واپس لے کر شمالی کرناٹک کے عوام سے معذرت خواہی کرنی چاہئے۔ بصورت دیگر وزیر اعلیٰ کے خلاف بی جے پی ریاست گیر تحریک شروع کردے گی۔ اخباری نمائندوں سے بات چیت کرتے ہوئے یڈیورپا نے کہاکہ کمار سوامی ریاست کی صرف 37 سیٹوں پر کامیابی حاصل کرکے وزیراعلیٰ بن بیٹھے ہیں، وہ پوری ریاست کے نمائندہ نہیں لیکن بحیثیت وزیر اعلیٰ ان کا فرض ہے کہ ریاست کے ہر فردکی یکساں طور پر نمائندگی کریں اور اس کے مفادات کے تحفظ کے لئے فکر مند ہوں۔ یڈیورپا نے کہاکہ اقتدار سنبھالنے میں اپنی ناکامی پر پردہ پوشی کے لئے کما رسوامی اس طرح نفرت کو ہوا دینے والے بیانات کا سہارا نہ لیں۔ فوری طور پر اپنے قول کی اصلاح کریں اور شمالی کرناٹک کے عوام سے معذرت خواہی کرتے ہوئے اس علاقے کی ترقی کے لئے حکومت کی طرف سے ٹھوس اقدامات کا اعلان کریں۔ انہوں نے کہاکہ وزیر اعلیٰ کمار سوامی صرف اقتدار کی ہوس کو پورا کرنے کے لئے ریاستی عوام سے کھلواڑ کررہے ہیں۔ انہوں نے کہاکہ وزیراعلیٰ کمار سوامی کے ایک احمقانہ بیان سے شمالی کرناٹک علاحدہ ریاست کے مطالبے کے شعلوں میں جھلس رہا ہے۔ اس کی ذمہ داری کمار سوامی اور ان کی حمایت کرنے والی کانگریس کو لینی چاہئے۔ بی جے پی کا یہی موقف ہے کہ متحدہ کرناٹک برقراررہے، لیکن کانگریس کا منشاء کیا ہے اس پارٹی کو واضح کردینا چاہئے۔