پارکوں میں اندرا کینٹین کی شروعات پر بی جے پی برہم
بنگلورو:11/ جولائی(ایس اونیوز) برہت بنگلور مہانگر پالیکے کی طرف سے شہر میں عوام کو کم قیمت پر ناشتہ اور کھانا فراہم کرنے کیلئے شروع کی جارہی اندرا کینٹین کے متعلق بی بی ایم پی میں اپوزیشن لیڈر پدمانابھا ریڈی نے کہا کہ بی بی ایم پی کسی بھی حال میں اندرا کینٹین قائم کرنے کیلئے پارکوں، کھیل کے میدانوں اور نالوں کے اطراف بفرزون کی زمینات استعمال نہ کرے۔ آج اپنے ایک اخباری بیان میں انہوں نے کہاکہ غریب عوام کو کم قیمت پر کھانا مہیا کرانے اندرا کینٹین کا اقدام خوش آئندہے۔ لیکن اس کینٹین کے قیام کیلئے جن مقامات کا انتخاب کیا گیا ہے وہ غیر قانونی محسوس ہوتا ہے، شہر کے پارکوں، کھیل کے میدانوں اور اقامتی علاقوں میں اس کینٹین کے قیام سے گریز کیا جائے۔ انہوں نے کہاکہ کینٹین کیلئے جن جگہوں کا انتخاب عمل میں آیا ہے اس کے متعلق رضاکار اداروں کی طرف سے بہت سارے اعتراضات موصول ہوئے ہیں اسی لئے جن کے متعلق اعتراضات موصول ہوئے ہیں بی بی ایم پی ان کینٹینوں کو ہٹانے کی طرف قدم اٹھائے، اگر کسی نے حکومت کی طرف سے جن جگہوں کی نشاندہی کی گئی ہے ان کا عدالت میں چیلنج کردیا تو اندرا کینٹین کے ذریعہ غریبوں کو جو فائدہ ہونے والا ہے وہ رک سکتا ہے۔