بی بی ایم پی کے اقتدار پر قبضہ کرنے بی جے پی کی کوشش ناکام
بنگلورو،15؍ستمبر(ایس او نیوز) ایک طرف ریاست کی کانگریس جے ڈی ایس مخلوط حکومت کو کسی بھی طرح غیر مستحکم کرکے اقتدار پر قبضہ کرنے کی کوشش میں منہ کی کھانے کے بعد اب بی جے پی کو بنگلور کی سطح پر بھی مات کھانی پڑی، جب برہت بنگلور مہانگر پالیکے میں کانگریس جے ڈی ایس اتحاد کو نقصان پہنچانے کے مقصد سے سابق وزیر آر اشوک نے آزاد کارپوریٹروں کو خریدنے کی کوشش بسیار کی۔
بتایا جاتاہے کہ کل رات آر اشوک نے شہر کے تین چار آزاد کارپوریٹروں کے ساتھ الگ میٹنگ کی اور ان کو لالچ دیتے ہوئے کہاکہ وہ بی جے پی کے خیمے میں آجائیں تو انہیں بی بی ایم پی میں مناسب چیرمین شپ سے سرفراز کیا جائے گا، تاہم ان تمام کارپوریٹروں نے اشوک کی ایک نہ سنی ۔ کہاجاتاہے کہ میئر اور ڈپٹی میئر کے عہدے پر قبضہ کرنے کے لئے اشوک نے ان کارپوریٹروں کو مشورہ دیا کہ میئر کے انتخاب کے لئے ہونے والی کونسل میٹنگ میں وہ غیر حاضر رہیں، اس غیر حاضری کے دوران ان کے بیرون ملک دورے کا سارا خرچ بی جے پی برداشت کرے گی۔ جب بی بی ایم پی کے اقتدار پر بی جے پی قابض ہوجائے گی تو واپس آکر وہ کسی بھی کمیٹی کی چیرمین شپ بھی حاصل کرسکتے ہیں، لیکن اس سلسلے میں جب اتفاق نہیں ہوپایا تو بی جے پی کو اس منصوبے میں زبردست شکست کا سامنا کرنا پڑا۔
بتایاجاتاہے کہ اشوک نے آزاد کارپوریٹروں کو آفر دیاکہ ان میں سے ایک کو ڈپٹی میئربنایا جائے گا اور باقی کواہم اسٹانڈنگ کمیٹیوں کی چیرمین شپ دی جائے گی۔ اس کے ساتھ یہ شرط بھی رکھی کہ پہلے وہ میئر کے انتخاب کے لئے بی جے پی کا ساتھ دینے کا وعدہ کریں۔ تاہم آزاد کارپوریٹروں نے بی جے پی لیڈرکی ایک نہ سنی ، اس کے علاوہ آزاد کارپویٹروں کو چیرمین شپ دئے جانے پر بی جے پی میں بھی شدید اختلافات پیدا ہوگئے اور بی جے پی کے کارپوریٹروں نے اقتدار کے لئے آر اشوک کی طرف سے آزاد کارپوریٹروں کو ڈپٹی میئر کا عہدہ اور چھ اہم کمیٹیوں کی چیرمین شپ دئے جانے کے منصوبے کو ماننے سے انکا ر کردیا، جس کے نتیجے میں بی بی ایم پی کے اقتدار پر قابض ہونے بی جے پی کی کوشش کو پہلے ہی مرحلے میں ٹھوکر لگ گئی۔
آزاد کارپوریٹروں کے ساتھ اشوک کی میٹنگ کی اطلاع جیسے ہی شہر کے بارسوخ کانگریس لیڈر رام لنگا ریڈی کو ملی تو انہوں نے آج صبح ہی شہر کے سبھی آزاد کارپوریٹروں کو اپنی رہائش گاہ طلب کرکے ان کے ساتھ تبادلۂ خیال کیا۔تمام آزاد کارپوریٹروں نے رام لنگاریڈی کے روبرو اپنے چند مطالبات رکھے اور یقین دلایا کہ پچھلے تین سال کے مانند کانگریس جے ڈی ایس اتحاد کے ساتھ ان کا تعاون برقرار رہے گا۔
ان کارپوریٹروں نے رام لنگا ریڈی کو بتایاکہ ابتدائی دو سال کے دوران آزاد کارپوریٹروں کو چیرمین شپ سے سرفراز کیاگیاتھا لیکن تیسرے سال انہیں کوئی چیرمین شپ نہیں دی گئی ۔اس بار آزاد کارپوریٹروں کو چیرمین شپ دی جائے۔ کہاجاتاہے کہ رام لنگا ریڈی نے آزاد کارپوریٹروں کے تمام مطالبات سے اتفاق کیا ہے اور کہا ہے کہ کانگریس قیادت کو وہ اس بات کے لئے باور کرائیں گے کہ آزاد کارپوریٹروں کو حسب معمول چیرمین شپ دی جائے۔ انہوں نے واضح کردیا کہ میئر کا عہدہ کانگریس کے پاس رہے گا اور ڈپٹی میئر جے ڈی ایس سے ہوگا۔ اس سے آزاد کارپویٹروں نے بھی اتفاق کرلیا۔