پٹنہ،15/اگست (پی ٹی آئی) شمالی بہار میں سیلاب کا قہر جاری ہے ۔بہار کے تقریباً 21 اضلاع سیلاب سے متاثرہیں ۔سیلاب میں اب تک جملہ 56 افراد لقمۂ اجل بن گئے ہیں جب کہ 65 لاکھ سے زیادہ افراد متاثر ہوئے ہیں۔ معلومات کے مطابق صرف ارریہ میں ہی ڈوب کر 20 لوگوں کی موت ہوئی جب کہ کشن گنج میں 5لوگوں کی جان گئی۔ اس کے علاوہ مشرقی چمپارن میں تین اورمغربی چمپارن میں 4 افراد کی موت کی خبر ہے ۔ دربھنگہ میں تین ،سیتامڑھی میں 7 اورمدھوبنی سے 2 افراد کی موت ہوئی ہے ۔پورنیہ کے مروناگاؤں میں چار بچے ڈوب گئے جن میں سے 2کی لاش نکالی گئی ہے۔ پٹنہ کے تاریخی گاندھی میدان میں یوم آزادی کے موقع پر لوگوں سے خطاب کرتے ہوئے وزیر اعلیٰ نتیش کمار نے کہاکہ سیلاب متاثرین کی ہر ممکن مدد کی جائے گی۔ حکومت پوری صورتحال پر نظر رکھ رہی ہے ۔ اچانک بارش سے شمالی بہار کے کئی اضلاع میں صورتحال تشویشناک ہے ۔ دربھنگہ کے گھنشیام پور ڈویژن کے رسیاری گاؤں کے پاس کملابلان کے پشتے دوجگہوں پر اچانک ٹوٹ جانے سے علاقہ میں تباہی مچ گئی ۔ لوگوں نے گھر بار چھوڑکر کسی طرح بھاگ کر اپنی جان بچائی۔ تباہی کا اندازہ اس سے لگایا جاسکتا ہے کہ بڑے بڑے درخت اکھڑ گئے اور دیکھتے ہی دیکھتے پانی میں سماگئے ۔گھروں میں پانی کمر تک تو اسکولوں میں سیلاب کا پانی کھڑکیوں تک پہنچ گیا۔