بنگلورو کے مختلف علاقوں میں طوفانی ہواؤں کے ساتھ بارش درختوں کے گرنے سے نقصانات،سڑکیں جام،ٹریفک متاثر
بنگلورو،30/اپریل(ایس او نیوز) شہر کے مختلف علاقوں میں بارش کے ساتھ طوفانی ہوائیں چلنے سے بہت نقصانات ہوئے ہیں۔ متعدد علاقوں میں بڑے بڑے درخت جڑ سے اکھڑ گئے جبکہ بعض علاقوں میں سڑکوں پر درخت گرنے سے گھنٹوں ٹریفک متاثررہا۔ ذرائع سے موصولہ اطلاع کے مطابق ہفتہ اور اتوار کو ریاست کے مختلف شہروں میں زبردست بارش ہوئی ہے۔ ان میں بلگاوی،وجیا پور، شیموگہ، چکمگلور اور کوڈگو اضلاع بھی شامل ہیں۔ جبکہ بعض علاقوں میں تھوڑی بارش ہوئی مگر زور دار طوفانی ہوائیں چلنے سے کافی نقصانات ہوئے ہیں۔ راجہ راجیشوری نگر، کتری گپے، بی ای ایم ایل لے آؤٹ، بی ایچ ای ایل پولیس کوارٹرس، کنگیری سیٹالائٹ ٹاؤن، ودیا پیٹھ سرکل، ہوسہلی ، وجئے نگر، ناگینہلی اور نرملا گری نگر میں بارش کے ساتھ ساتھ تیز ہوائیں چلنے سے کافی نقصانات کی خبرہے۔ ذرائع نے بتایا کہ بعض اہم راستوں پر درخت گرنے سے گھنٹوں ٹریفک جام جس کی وجہ سے ٹاؤن ہال، کے جی روڈ، جے سی روڈ، ہسور روڈ، بنرگٹہ روڈ، لال باغ ویسٹ گیٹ روڈ اور خلاصی پالیم سے گزرنے والی گاڑیاں بہت دیر تک سڑکوں پر کھڑی رہیں۔شام کے وقت لوگوں کو اپنے گھر تک پہنچنے میں کافی تاخیر اور پریشانیوں کا سامنا کرنا پڑا۔ انڈیا میٹرو لوجیکل ڈپارٹمنٹ( آئی ایم ڈی) نے اس سلسلہ میں بتایا کہ شہر کے مختلف علاقوں میں کہیں کم اور کہیں زیادہ بارش ہوئی۔ سب سے زیادہ3.8ایم ایم بارش شہر میں ریکارڈ کی گئی ہے۔ اتوار کی شام کو بھی مختلف مقامات پر تیز ہواؤں کے ساتھ بارش ہوئی۔ آئی ایم ڈی کے ایک افسر نے بتایا کہ اس بار قبل از وقت مانسون سے جہاں فائدے ہورہے ہیں وہیں نقصانات کی خبریں بھی موصول ہورہی ہیں۔ انہوں نے بتایا کہ بعض مقامات پر پیڑ گرنے سے وہاں پر کھڑی گاڑیوں کو نقصان پہنچا ہے۔ حالانکہ اس بارش سے گرمی کی شدت میں کمی آئی ہے۔ ریاست کے دیگر اضلاع کے بارے میں انہوں نے بتایا کہ شمالی کرناٹک میں گرمی کی شدت بہت زیادہ ہے جس کی وجہ سے وہاں کے لوگ پریشان ہیں اور گرمی کی تپش سے جانوروں کو بھی پریشانیوں کا سامنا ہے۔