بنگلورو،24؍ستمبر(ایس او نیوز) بنگلور ڈیولپمنٹ اتھارٹی کی طرف سے ترتیب دئے جارہے ناڈا پربھو کیمپے گوڈا لے آؤٹ کے سائٹوں کی تقسیم کا عمل بنگلور ڈیولپمنٹ اتھارٹی میں کل شروع ہوگا۔ پہلے مرحلے میں پانچ ہزار سائٹیں الاٹ کی جائیں گی، ایک ہزار افراد کو 20x30 ، ڈھائی ہزار افراد کو30x40 ، سات سو افراد کو 40x60اورآٹھ سو افراد کو50x80 سائٹوں کی تقسیم کی جائے گی۔وزیراعلیٰ ایچ ڈی کمارسوامی قرعہ اندازی کے ذریعے درخواست گزاروں کو سائٹوں کی تقسیم کریں گے۔کل صبح ساڑھے گیارہ بجے سائٹوں کی تقسیم کا عمل شروع ہوگا۔ سائٹوں کی تقسیم کے عمل میں درخواست گزاروں کی عمر ، ان کے ریزرویشن وغیرہ کے ضوابط کو بھی خاطر میں رکھا جائے گا۔ پہلے مرحلے میں پانچ ہزار سائٹوں کی تقسیم کے بعد اگلے مرحلے میں باقی سائٹیں تقسیم کی جائیں گی۔عارضی طور پر 600مربع فیٹ اور12 مربع فیٹ کی سائٹوں کا الاٹمنٹ فوری طور پر کردیا جائے گا۔ جن امیدواروں کو سائٹ الاٹ کی جائے گی انہیں سائٹ کی مکمل رقم ادا کرنے کے لئے 60 دن کا وقت دیا جائے گا اس مدت میں اگر وہ رقم ادا نہیں کرپائے تو مزید 90 دنوں کا موقع ملے گا، ان دونوں میعادوں میں اگر رقم ادا نہیں کی گئی تو 21 فیصد سود کے ساتھ رقم وصول کی جا ئے گی، بصورت دیگر سائٹ کی منظوری منسوخ ہوجائے گی۔ سائٹ کا الاٹمنٹ ہوتے ہی پہلی قسط کی رقم جمع کرادینی ہوگی۔جن درخواست گزاروں کو سائٹ الاٹ نہیں ہوئی بی ڈی اے ان کے ڈپازٹ کی رقم ان کے بینک کھاتوں میں لوٹا دے گی۔ کیمپے گوڈا لے آؤٹ کے لئے سائٹوں کی تقسیم کاعمل دراصل ریاستی اسمبلی انتخابات سے پہلے ہونا تھا لیکن اس سلسلے میں عدالت میں تنازعہ ہونے کے سبب اسے موخر کردیاگیا۔ بی ڈی اے کے لئے زمین خالی کرنے والے زمین مالکوں نے معاوضے کی ادائیگی میں کمی کی شکایت کرتے ہوئے عدالت سے رجوع کیا تھا ، تاہم اب اس معاملے کو سلجھا لیا گیا ہے۔ کیمپے گوڈا لے آؤٹ، میسور روڈ اور ماگڑی روڈ رنگ روڈ کے درمیان واقع ہے، اس لے آؤٹ کے ذریعے بی ڈی اے نے 25ہزار سائٹوں کی تقسیم کا نشانہ طے کیا ہے۔