بنگلورو،27؍جولائی(ایس او نیوز)برہت بنگلور مہانگر پالیکے نے شہر بھر میں کام کرنے والے خاکروبوں کو اسکان کی طرف سے کھانے کی فراہمی پر روک لگاتے ہوئے اعلان کیا ہے کہ ان لوگوں کو اب کھانا اندرا کینٹین کے ذریعے مہیا کرایا جائے گا۔ یکم اگست سے تمام خاکروب اندرا کینٹین میں راست طور پر کھانا کھا سکتے ہیں۔ اسکان نے خاکروبوں کو کھانا مہیا کرانے کے لئے فی کس 24 روپے فراہم کرنے کی مانگ رکھی ، لیکن بی بی ایم پی نے 20 روپیوں کے حساب سے رقم دینے کی بات کہی، جسے اسکان نے مسترد کردیا۔ بی بی ایم پی کمشنر منجوناتھ پرساد نے آج ایک اخبار ی کانفرنس میں بتایا کہ بی بی ایم پی اور اسکان کے درمیان معاہدہ ختم ہوجانے کے سبب اب یہ طے کیاگیا ہے کہ خاکروبوں کو کھانا اندرا کینٹینوں کے ذریعے مہیا کرایا جائے گا اور کھانے کے لئے فی پلیٹ 20 روپیوں کی رقم بی بی ایم پی کی طرف سے اندرا کینٹین کے انتظامیہ کو فراہم کردی جائے گی۔ کمشنر نے بتایاکہ بی بی ایم پی نے حال ہی میں خاکروبوں کی تنخواہوں کی ادائیگی میں تاخیر کی شکایت کا کافی سختی سے نوٹس لیا ہے ، آئندہ یہ یقینی بنانے کا فیصلہ کیا گیا ہے کہ کسی بھی حال میں تنخواہوں کی ادائیگی میں تاخیر نہیں کی جائے گی۔ انہوں نے کہاکہ ہر وارڈ میں کتنے خاکروب کام کررہے ہیں اس کے لئے میاپنگ کا منصوبہ کیا گیا ہے۔ شہر میں جابجا کیبل اور پائپ لائینوں وغیرہ بچھانے کے لئے کی جانے والی کھدائی کے سلسلے کو روکنے کے لئے انہوں نے بتایاکہ آئندہ بی بی ایم پی کی منظو ری کے بغیر شہر میں سڑکوں پر کھدائی کی گئی تو اس کے لئے ذمہ دار ایجنسیوں اور افراد کے خلاف بلامروت کارروائی کی جائے گی۔ کھدائی کے لئے اگر اجازت درکار ہے تو قبل از و قت لینی ہوگی، اور کھدائی کے بعد جو بھی مرمت کی گئی ہے اس کی رپورٹ بی بی ایم پی کے پاس جمع کرانی ہوگی، بصورت دیگر بی بی ایم پی کی طرف سے سخت کارروائی کی جائے گی۔