بنگلورو،17/نومبر (پی ٹی آئی) حال ہی میں ہوئیں مسلسل بارشوں کے دوران اور بعد میں بارش کے پانی کے غیر سائنٹیفک نظام سے راستوں پر سیلاب کی شکل میں پانی کے در آنے سے بی بی ایم پی انتظامیہ اور اس کے ناقص نیٹ ورک کی پول کھل گئی۔ اس نقص کو دورکرنے کے لئے بی بی ایم پی نے بارش کے پانی کی نکاسی کے لئے شہر میں جاری کام کی پیش رفت کی نگرانی ڈرون کے ذریعہ کرنے کا فیصلہ کیا ہے تاکہ اس کام کی شفافیت سے کوئی گوشہ تشنہ نہ رہ جائے۔ میئر سمپت راج کے کئے گئے فیصلے کے بارش کے پانی کی نکاسی کے سارے کام کا ریکارڈ ڈرون کے ذریعہ کیا جائے گا تاکہ کام میں کوئی کوتاہیاں نہ رہ جائیں۔ منصوبے کے تحت ڈرون کے ذریعہ لی گئی ویڈیوز اور تصاویر کو لازمی بنایا جائے گا اور یہ ریکارڈ کنٹراکٹروں کے بل منظور ہونے سے قبل دیکھے جائیں گے تاکہ یہ یقینی بنایا جائے کہ کام معیاری اور نقائص کے بغیر ہو۔ ان تمام امور کا جائزہ بی بی ایم پی انجینئرنگ سیکشن میں لیا جائے گا۔ بی بی ایم پی کے ایک افسر نے بتایا کہ میئر کی جانب سے جاری ہدایات کے مطابق ہمیں اس بات کو یقینی بنانا ہے کہ کام کے ویڈیوز ڈرون کے ذریعہ لئے جارہے ہیں۔ اس طریقہ کار کا سب سے بڑا فائدہ یہ ہے کہ کام کی نگرانی چاروں پہر کی جاسکے گی اگر کہیں کوئی خامی رہ گئی ہو تو اس کے ثبوت کے طور پر ویڈیو یا فوٹو موجود رہے گا۔ کام کی رفتار کے تعلق سے عوام بھی بی بی ایم پی کو فیڈ بیک دے سکتے ہیں۔ یہ طے کیاگیا ہے کہ ڈرون کے ذریعہ کیمرے میں قید ویڈیوز بی بی ایم پی ویب سائٹ پر اپ لوڈ کئے جائیں گے۔ علاوہ ازیں عوام کے فیڈ بیک کے لئے ایک علاحدہ ’’لنک ‘‘ بھی رکھی جائے گی۔