بنگلورو،27؍فروری(ایس او نیوز) برہت بنگلور مہانگر پالیکے کی اکاؤنٹ کمیٹی چیرمین نیتراوتی نارائن نے کہاکہ شہر میں سڑک پار کرنے کیلئے بی بی ایم پی کی طرف سے تعمیر کئے جارہے اسکائی واک پر اشتہارات کے معاملے میں اعلیٰ افسران کی ملی بھگت سے بڑے پیمانے پر دھاندلیاں ہورہی ہیں۔آج ایک اخباری کانفرنس سے خطاب کرتے ہوئے نیتراوتی نارائن ، کمیٹی کے ممبر گوتم اور دیگر نے کہاکہ بی بی ایم پی کی طرف سے جن کنٹراکٹروں کو بلیک لسٹ کیا گیا ہے افسران نے انہی کنٹراکٹروں کو اسکائی واک کی تعمیر کا ذمہ دے کر کروڑوں روپیوں کی ہیرا پھیری کی ہے۔ جن علاقوں میں ٹرافک اور عوام کی آمد ورفت زیادہ ہے وہاں بی بی ایم پی کی طرف سے سڑک پارکرنے کیلئے اسکائی واک کی تعمیر کا اعلان کیا گیاہے، اس منصوبے کے مطابق ان اسکائی واکس پر اشتہارات کا ٹھیکہ منظور شدہ اشتہاری کمپنیوں کو دیا جانا چاہئے، لیکن افسران نے قانون شکنی کرتے ہوئے ممنوعہ کمپنی پرکاش ایڈ اور ریفل میڈیا کو دئے ہیں۔ اسی لئے کمیٹی نے طے کیا ہے کہ ان دونوں کمپنیوں کو آئندہ کوئی ٹھیکہ نہ دیا جائے۔ کمیٹی کے اس فیصلے کے باوجود افسران نے کروڑوں روپیوں کی ہیرا پھیری کرکے اسی کمپنی کو اسکائی واک کا ٹھیکہ دیا ہے۔ انہوں نے کہاکہ بس اسٹانڈوں میں اس کمپنی کی طرف سے اشتہارات لگواکر ماہانہ 80ہزار روپیوں کا کرایہ وصول کرنا طے کیاگیا ، لیکن اس میں سے صرف پانچ ہزار روپے بی بی ایم پی کو مل رہے ہیں باقی 75ہزار روپے کہاں ہیں، ا س کاکوئی حساب کتاب افسران نے نہیں دیا ہے ۔ نیتراوتی نے بتایاکہ شہر میں 2349 غیر قانونی ہورڈنگس ہیں، ان میں سے 1841ہورڈنگس کو ہٹادئے جانے کی اطلاع ان افسران نے ہائی کورٹ کو دی ہے۔ ان ہورڈنگس پر آنے والا خرچ ہورڈنگس لگانے والے کنٹراکٹرس اور ان کے انہدام کی تفصیلات افسران نے بی بی ایم پی کو اب تک نہیں دی ہیں۔انہوں نے کہاکہ کمیٹی کی طرف سے بھی اس سلسلے میں سخت ہدایت کے باوجود افسران نے عدالت کو گمراہ کیا ہے۔شہر میں کسی بھی اشتہاری ہورڈنگ کیلئے بی بی ایم پی میں اندراج اور ڈپازٹ جمع کرانا لازمی قراردیا گیا ہے۔ شہر میں جو باضابطہ ہورڈنگس ہیں ان کا ڈپازٹ کس سے وصول کیا گیا ہے اور کہاں جمع کیا گیا ہے اس بارے میں بھی افسران کے پاس کوئی تفصیلات موجود نہیں ہیں۔ یہاں تک کہ اس سلسلے میں موجود فائلیں غائب کردی گئی ہیں۔ نیتراوتی نے بی بی ایم پی کمشنر منجوناتھ پرساد سے مطالبہ کیا ہے کہ فوری طور پر بی بی ایم پی کے شعبۂ اشتہارات کا بینک کھاتہ منجمد کیاجائے اور خاطیوں کے خلاف سخت کارروائی کی جائے۔