بنگلورو،16؍فروری(ایس اونیوز) برسوں بعد ایک بار پھر بنگلور کی پرپنا اگراہارا جیل تملناڈو کی راجدھانی میں تبدیل ہوچکی ہے۔ پہلے آنجہانی وزیر اعلیٰ جئے للیتا کے ایام قید میں تملناڈو حکومت کے سبھی فیصلے اسی جیل میں لئے جاتے ، اب اے آئی اے ڈی ایم کے کی سربراہ ششی کلا کو اس جیل میں قید کیاگیاہے، جس کے سبب اس حکومت کے سبھی فیصلے غالباً اسی جیل سے لئے جائیں گے۔ششی کلانے سپریم کورٹ کی طرف سے انہیں مجرم قرار دئے جانے کے بعد اپنے دست راست پلانی سوامی کو وزیراعلیٰ مقرر کیا۔ اب توقع کی جارہی ہے کہ جس طرح جئے للیتا نے پنیر سلوم کے ذریعہ بنگلور سنٹر ل جیل سے ریموٹ کنٹرول حکومت چلائی تھی، اسی طرح ششی کلا نٹراجن بھی پلانی سوامی کے ذریعہ ریموٹ کنٹرول حکومت چلائیں گی۔ جس وقت کرناٹک ہائی کورٹ نے جئے للیتا کو سزا دئے جانے کے فیصلے کو کالعدم قرار دیتے ہوئے انہیں رہائی دی تھی، اس وقت پنیر سلوم نے اپنی وفاداری نبھاتے ہوئے جئے للیتا کے حق میں وزیر اعلیٰ کی کرسی خالی کردی، یہاں تک کہ جب تک وہ وزیراعلیٰ رہے اور جئے للیتا قید میں رہیں تو پنیر سلوم نے جئے للیتا کی کرسی خالی رکھی، اور بازو ایک الگ کرسی رکھ کر ریاست کا اقتدار چلا رہے تھے۔اب اے آئی اے ڈی ایم کے لیجسلیچر پارٹی کے نئے لیڈر پلانی سوامی کو بھی بار بار بنگلور کا رخ کرکے ریاست کا اقتدار چلانا پڑ سکتا ہے۔