بنڈی پور آگ پر قابو پانے کیلئے چار ہیلی کاپٹروں کا استعمال سوشیل میڈیا کے غلط استعمال پر روک لگانے رہنما اصول ترتیب دیئے جائیں گے: وزیر اعلیٰ کمار سوامی
بنگلورو،26؍فروری (ایس او نیوز) وزیراعلیٰ ایچ ڈی کمار سوامی نے کہاکہ سوشیل میڈیا کا انتہائی غلط استعمال ہورہا ہے، اہم شخصیات کو ٹرول کے ذریعہ تنقید کا نشانہ بنایا جارہا ہے۔ انہوں نے کہاکہ ایسے واقعات کی روک تھام اور سوشیل میڈیا کو قابو میں رکھنے کے لئے نیا قانون مرتب کیا جائے گا اور سائبر کرائم کو حدود وقیود میں رکھنے کے لئے سنجیدہ اقدامات کئے جائیں گے۔
پولیس ہیڈ کوارٹرس میں منعقدہ پولیس اعلیٰ افسروں کے اجلاس کے بعد اخباری کانفرنس سے خطاب کے دوران وزیراعلیٰ نے کہاکہ اورادکر رپورٹ جاری کرنے کا فیصلہ کیاگیا ہے۔ اس کے علاوہ سوشیل میڈیا میں مسلسل ٹرول کے واقعات پیش آرہے ہیں۔ اس قسم کے واقعات کو کنٹرول میں لانے کے لئے چند رہنما اصول ترتیب دینے کی اشد ضرورت ہے۔ اس کام کے لئے سائبر کرائم کو ذمہ داری دی جائے گی۔ وزیراعلیٰ نے کہاکہ ریاست میں آتشزدگی کے واقعات پر قابو پانے کے لئے درکار اقدامات کئے جائیں گے۔
انہوں نے بتایا کہ بنڈی پور جنگلاتی علاقوں میں لگی آگ پر قابو پانے کے لئے وزارت دفاع کے 4؍ہیلی کاپٹروں کا استعمال کیا جائے گا۔ انہوں نے بتایا کہ مرکزی وزیر دفاع نرملاسیتارمن سے تبادلہ خیال کرتے ہوئے گزشتہ چند دنوں سے بنڈی پور جنگلاتی علاقوں میں لگی آگ پر قابو پانے کے لئے دفاعی ہیلی کاپٹروں کو روانہ کرنے کی گزارش کی گئی تھی جس پر وزیردفاع نے فوری اپنی منظوری دے دی ہے۔ وزیراعلیٰ نے بتایا کہ میسور۔ کورگ ۔ بنڈی پور، ناگرہولے جنگلاتی علاقوں میں لگی آگ پر قابو پانے کے لئے دفاعی ہیلی کاپٹرس استعمال میں لائے گئے۔ ہیلی کاپٹرس نے اوپر سے پانی برساکر آگ کو قابو میں کیا ہے۔
انہوں نے بتایا کہ پہلی مرتبہ ہیلی کاپٹروں کے ذریعہ پانی کو کبنی، کے آر ایس اور قریبی کاویری طاس علاقوں کے ڈیمس سے حاصل کیاگیا ہے۔ 8سے 10 ہزار ایکڑ جنگلاتی علاقے میں آگ لگی ہوئی ہے۔ فی الوقت آگ پر قابو پالیاگیا ہے۔ ہرسال آگ حادثات کو لے کر احتیاطی اقدامات کرنے پر زور دیا جانا چاہئے۔ انہوں نے کہاکہ اس طرح کی آتشزنی کے واقعات صرف ریاست میں ہی پیش نہیں آئے بلکہ کیلی فورنیا میں بھی پیش آچکے ہیں۔ انہوں نے بتایا کہ بنڈی پور کے آتشزدہ مقام پر وزیر برائے جنگلات اور افسر قیام کئے ہوئے ہیں اورآگ پر قابو پانے کے لئے درکار کارروائی میں جڑے ہوئے ہیں۔
شہر کی مضافات یلہنکا ایربیس علاقے کے گیٹ نمبر5؍کے پارکنگ مقام پر لگی آگ حادثہ پر وزیراعلیٰ نے کہاکہ ابتدائی جانچ سے پتہ چلا ہے کہ سوکھے گھاس کی وجہ سے آگ لگی تھی لیکن ابھی اس کی اصل وجہ کا پتہ نہیں چلا ہے، اس کی جانچ جاری ہے۔ انہوں نے بتایا کہ اگلی مرتبہ ایرو انڈیا شو2021-شہرمیں منعقد نہ کرنے کے سلسلہ میں کوئی سازش نہیں کی گئی ہے۔ اگلا ایرو انڈیا شو بھی شہر ہی میں منعقد ہوگا۔ وزیراعلیٰ نے کہاکہ آتشزدگی کے واقعہ کو لے کر وہ کوئی سیاست کرنا نہیں چاہتے۔ گزشتہ دنوں انہوں نے مرکزی وزیر دفاع ، ریاستی وزیر داخلہ، ایر فورس اور محکمہ پولیس کے افسروں کے ساتھ تبادلہ خیال کرکے اس واقعہ کو سیاسی رنگ نہ دینے اور مرکز وریاستی حکومتوں کے خلاف الزامات نہ لگانے کا فیصلہ کیا ہے۔
انہوں نے کہاکہ اس معاملہ کی جانچ جاری ہے۔ رپورٹ موصول ہونے کے بعد کارروائی ہوگی۔ کارمالکوں کو جو نقصان پہنچاہے۔ بہت جلد انہیں بیمہ رقم واپس دی جائے گی۔ پارلیمانی انتخابات سے قبل سوشیل میڈیا کا غلط استعمال ہورہا ہے اس کے لئے بہت جلد نئے رہنما اصول تیار کئے جائیں گے۔ وزیراعلیٰ نے کہاکہ پارلیمانی انتخابات کے دوران نظم وضبط ، امن وامان برقرار رکھنے کے لئے محکمہ پولیس کو حکم دیا گیا ہے۔ حالیہ دنوں ریاست کے ساحلی علاقوں میں سازش کے تحت حکومت کو بدنام کرنے فسادات کروانے کی فرقہ پرست بی جے پی کی کوششیں تیز ہوگئی ہیں۔ اس پر کڑی نظر رکھنے کے لئے انہوں نے اعلیٰ پولیس افسروں کو حکم دیا ہے۔
وزیراعلیٰ نے بتایا کہ اسمبلی انتخابات کے دوران پولیس اہلکاروں نے پوری ایمانداری اور فرض شناسی کے ساتھ ڈیوٹی انجام دی تھی۔ کوئی بھی ناخوشگوار واقعہ رونما نہیں ہوا ۔ انہوں نے پولیس اہلکاروں کو مشورہ دیا کہ وہ آنے والے پارلیمانی انتخابات کے دوران بھی اسی طرح کی ڈیوٹی انجام دیتے ہوئے ریاست میں امن وامان کو برقرار رکھیں۔ انہوں نے کہاکہ عوام کو میٹر سود کے ذریعہ پریشان اور زمینات کے مالکوں کو تکلیف پہنچانے والے افراد کے خلاف سخت کارروائی کرنے کے لئے پولیس کو ہدایت دی گئی ہے۔ انہوں نے کہاکہ رئیل یسٹیٹ کے نام پر ہزاروں افراد کو دھوکہ دیا جارہا ہے۔ ایسے واقعات پر مکمل طور پر قابو پانے کے لئے درکار اقدامات کرنے کی بھی ہدایت دی گئی ہے۔ حکومت سے محکمہ پولیس کو کئی اختیارات دئے گئے ہیں۔ اس کا صحیح استعمال کرتے ہوئے ظلم اور دھوکہ دہی کے معاملات میں ملوث افراد کے خلاف کارروائی کریں۔ وزیراعلیٰ نے ریاست کی پولیس کی کارکردگی پر اطمینان کا اظہارکیا۔
پولیس اعلیٰ افسروں کے اجلاس کے دوران انہیں بنیادی سہولتیں اور انفراسٹرکچر کی مانگ کی گئی ہے۔ اس مرتبہ بجٹ میں محکمہ پولیس کے لئے مختص فنڈ میں اضافہ کی گزارش کی گئی ہے۔ اس پر سنجیدگی سے غور کرنے کا انہوں نے یقین دلایا ہے۔ انہوں نے بتایا کہ ہرسال اعلیٰ افسروں کے تبادلہ ہوا کرتے ہیں۔ دوسال تک ایک ہی مقام پر ڈیوٹی انجام دے رہے افسروں کا تبادلہ کیاگیا ہے۔ انہوں نے بتایا کہ یہ سچ ہے کہ آبادی کے تناسب سے پولیس اہلکاروں کی تعداد کم ہے۔ گزشتہ سال8؍ہزار پولیس اہلکاروں کی تقرری ہوئی۔ ان اہلکاروں کی تربیت جاری ہے۔ تربیت ختم ہوتے ہی اپنی ڈیوٹی انجام دیں گے۔
انہوں نے بتایاکہ ہرسال 18؍سے20؍ہزار عہدے محکمہ پولیس میں خالی ہوتے ہیں۔ یہ عہدے وقتاً فوقتاً بھرتی کئے جائیں گے۔ انہوں نے کہاکہ منشیات کی فروخت کے واقعات میں اضافہ ہونے لگا ہے۔ اس پر مکمل قابو پانے کے لئے اقدامات کرنے پولیس اہلکاروں کو ہدایت دی گئی ہے۔ انہوں نے بتایا کہ مافیا ڈان روی پجاری کو شہر لانے کے لئے قانون کے دائرے میں افسر کام کررہے ہیں۔ اجلاس میں وزیرداخلہ ایم بی پاٹل، ڈائرکٹر جنرل و انسپکٹر جنرل آف پولیس نیلامنی ایس راجو، محکمہ داخلہ کے اڈیشنل چیف سکریٹری رجنیش گوئل، پولیس کمشنر ٹی۔ سنیل کمار، ڈائرکٹر جنرل آف پولیس (نظم وضبط) کمل پنت ، ڈی جی پی (سی آئی ڈی) پراوین سود، ڈی جی پی (فائرسرویسس) ایم۔ این۔ ریڈی، ڈی جی پی ڈائرکٹر یم اے سلیم کے علاوہ دیگر اعلیٰ پولیس افسر شریک تھے۔ اجلاس میں ریاست بھر کے ڈی جی پی، اے ڈی جی پی ،آئی جی پی، ڈی آئی جی ایس پی، ڈی سی پی سطح کے اعلیٰ پولیس افسروں نے بھی شرکت کی تھی۔