بنگلورو،17؍نومبر(ایس او نیوز) ریاستی وزیر برائے کوآپریشن بینڈپا قاسم پور نے کہا ہے کہ محکمے کے تحت آنے والے دیہی اور ٹاؤن بینکوں کی ترقی کے لئے تمام اقدامات کی ریاستی حکومت پابند ہے۔ آج شہر کے محکمۂ کوآپریشن کی طرف سے سالانہ کوآپریٹیو ہفتے کا افتتاح کرنے کے بعد انہوں نے کہاکہ اس سال کوآپریٹیو اور نجی شعبوں کی شراکت کو بڑھاوا دینے کی طرف خصوصی توجہ دی جائے گی۔ انہوں نے کہاکہ کوآپریٹیو شعبہ ملک کاوحد شعبہ ہے جو عام آدمی کی حصہ داری سے آگے بڑھ رہاہے۔ خاص طور پر دیہی بینکوں کے ذریعے دیہی عوام کو بہت ساری سہولتیں کوآپریٹیو شعبے کے بدولت ہی میسر آرہی ہیں۔انہوں نے کہاکہ کوآپریٹیو شعبے میں گجرات کے بعد کرناٹک تیز رفتاری سے ترقی کرنے والی دوسری سب سے بڑی ریاست ہے۔ ریاست بھر کے 307 ٹاؤن کوآپریٹیو بینکوں میں 31ہزار کروڑ روپیوں کی رقم ڈپازٹ کی گئی ہے۔ جبکہ 18ہزار کروڑ روپیوں کے قرضے دئے گئے ہیں۔ انہوں نے کہاکہ اپکس بینک اور ضلع کوآپریٹیو بینکوں کو حکومت کے ساتھ تال میل بہتر رکھنا چاہئے۔ انہوں نے بتایاکہ ریاستی حکومت اس بات پر غور کررہی ہے کہ سرکاری خزانے سے رقم کوآپریٹیو بینکوں میں بطور ڈپازٹ رکھی جائے۔ انہوں نے اس بات پر زور دیا کہ دیہی علاقوں میں قرضوں کی فراہمی کے لئے جو دائرہ مقرر کیا گیا ہے اس کو وسیع کیا جائے اور دیہاتوں میں آباد لوگوں کو زیادہ مالی سہولت مہیا کرانے کی کوشش کی جائے۔ انہوں نے کہا کہ ریاست بھر میں شکر کے 37 کارخانے موجود ہیں جن میں سے صرف سات ہی چل رہے ہیں جبکہ مہاراشٹرا کے سبھی شکر کے کارخانے بہترین طریقے سے چلائے جارہے ہیں اس سے اس ریاست کو کافی آمدنی بھی ہورہی ہے، آنے والے دنوں میں ریاست بھر کے شکر کے کارخانوں کو بہتر بنانے اور کوآپریٹیو تحریک کے ذریعے انہیں مستحکم کرنے کی طرف بھی خصوصی توجہ دی جائے گی۔ اس موقعے پرسابق وزیر ایچ کے پاٹل ، رکن اسمبلی ایس روی ، رکن کونسل رمیش بابو، اور دیگر موجود تھے۔