بدعنوانوں کی آؤبھگت قابل تشویش: جسٹس ہیگڈے
بنگلورو،21؍فروری(ایس او نیوز)سابق لوک آیوکتہ جسٹس سنتوش ہیگڈے نے آج اس بات پر تشویش کا اظہار کیا کہ معاشرہ میں مالداروں اور حکمرانوں کی آؤبھگت کی جارہی ہے، جس کے ذریعہ بدعنوانی کو فروغ مل رہا ہے۔ پریس کلب میں سابق پولیس افسر جی اے باوا کی قیادت والے جنا پرا ویدیکے کی جانب سے کتابچہ ، لوگو اور ویب سائٹ کا اجراء کرتے ہوئے انہوں نے بتایاکہ موجودہ دور میں بدعنوانوں کی عزت ہورہی ہے اور دیانتدار طبقہ کو نظر انداز کیا جارہاہے، جو لوگ جیل سے رہا ہوکر باہر آتے ہیں انہیں تہنیت پیش کی جارہی ہے جو تشویشناک بات ہے۔ایسے میں تمام طبقات کے لوگوں کو مساوی انصاف فراہم کرنا وقت کا اہم تقاضہ ہے۔ جسٹس ہیگڈے نے بتایاکہ ہر شہری عدلیہ کے ذریعہ انصاف حاصل کرنے کی کوشش کررہا ہے، مگر عدلیہ میں خود ناانصافی ہورہی ہے۔ ایسے میں عدلیہ پر بڑھ رہے بوجھ کے سبب بھی مقدمات کی یکسوئی میں تاخیر ہورہی ہے۔ ایسے میں عدالتوں کے باہر مقدمات کی یکسوئی کیلئے این جی اوز کو آگے آنے کی ضرورت ہے۔آئین نے تمام شہریوں کو ان کے حقوق فراہم کئے ہیں ، جس کے ذریعہ وہ عدالتوں سے انصاف حاصل کرسکتے ہیں، مگر آج کل عدالتوں میں بھی من چاہا انصاف مل رہاہے۔ اس موقع پر جی اے باوا ، شام سندرا، الکیشور اور منوراما کے علاوہ دیگرموجود تھے۔