امبیڈنٹ گھوٹالہ پر پردہ ڈالنے کی منظم سازش گھپلہ باز وجئے تا تا کو بچانے میں سینئر پولیس افسرملوث :ویدیکے
بنگلورو15؍دسمبر(ایس او نیوز) امبیڈنٹ چٹ فنڈ کمپنی کے گھوٹالہ معاملہ پر پردہ ڈالنے کی منظم کوشش ہورہی ہے ۔ حکومت کرپٹ سیاستدانوں کو بچانے کیلئے امبیڈنٹ سے دھوکہ کھائے متاثرین کے ساتھ ناانصافی کررہی ہے۔ یہ الزامات لنچا مکتا کرناٹک (رشوت سے پاک کرناٹک) ویدیکے نے لگائے ہیں۔
ویدیکے کے ریاستی صدر روی کرشنا ریڈی نے پریس کانفرنس میں کہا کہ سید فرید احمد نے2016ء میں امبیڈنٹ مارکیٹنگ پرائیویٹ لمٹیڈ نامی کمپنی بنگلور میں شروع کی تھی۔کثیر سود بنام منافع کا جھانسہ دے کر 15ہزار سے زائد افراد سے سرمایہ کاری کرواتے ہوئے عوام کوچونالگادیا ۔ دھوکہ کھانے والوں کی اکثریت غریب ، متوسط اور غریب مسلم طبقات سے تعلق رکھتی ہے۔ ان غریب افراد سے تقریباً954کروڑ روپئے کی رقم بطور سرمایہ کاری حاصل کرکے ان کی آنکھوں میں دھول جھونک دی گئی ۔ امبیڈنٹ گھپلہ کی بو2017ء میں لگ گئی تھی ۔ متاثرہ افراد انصاف اور اپنی جمع پونجی واپس کرنے کے اصرار کے ساتھ جدوجہد کررہے تھے۔ لیکن چند کرپٹ سیاستدان اور کرپٹ پولیس افسروں کی دنڈی مار بدعنوان کارستانی کی وجہ سے عوام کو اب تک انصاف نہیں ملا۔ کرپٹ سیاستدان اور پولیس افسروں کے درمیان مفاہمت کی وجہ سے فرض شناس پولیس افسروں کی محنت رائیگاں چلی گئی۔ انہوں نے افسوس کااظہار کرتے ہوئے کہا کہ بین الاقوامی گھپلہ باز وجئے تا تا کو بچانے میں سینئر پولیس افسروں کی شمو لیت باعث تشویش ہے۔
انہوں نے مزید کہا کہ امبیڈنٹ معاملہ میں اب تک کی تحقیقات کے دوران رونما جھول منصوبہ بند دکھائی دیتے ہیں۔جس سے یہ گمان یقین تک پہنچ جاتا ہے کہ تحقیقات میں جھول لاکر رکاوٹیں کھڑی کرنے کا مقصد کروڑوں روپئے امبیڈنٹ گھوٹالہ پر پردہ ڈالنا ہے۔ حکومت سے ہماری گزارش ہے کہ خاطی افسروں کے خلاف کارروائی کرتے ہوئے عوام کو انصاف فراہم کرے تاکہ متاثرین کی محنت کی رقم کو واپس حاصل کرنے کا راستہ ہموار ہوجائے ۔