یڈیورپا کا ذہنی توازن بگڑ گیا ہے: دنیش گنڈو راؤ،بے بنیاد الزامات کے خلاف 23 فروری کو کانگریس کا احتجاج
بنگلورو،21؍فروری(ایس او نیوز) کے پی سی سی کارگذار صدر دنیش گنڈو راؤ نے سابق وزیر اعلیٰ بی ایس یڈیورپا کے ذریعہ وزیراعلیٰ سدرامیا پر عائد الزامات کو بے بنیاد قرار دیتے ہوئے بتایاکہ شاید بی جے پی صدر کا دماغی توازن بگڑ گیا ہے، انہیں اچھے ڈاکٹر کے پاس علاج کرانے کی ضرورت ہے۔اخباری کانفرنس سے خطاب کرتے ہوئے انہوں نے بتایاکہ بی جے پی کے احتجاج کے جواب میں 23 فروری کو کانگریس کے ذریعہ ستیہ میو جیاتے احتجاج کیا جائے گا۔ انہوں نے بتایاکہ یڈیورپا کے ذریعہ جو الزامات عائد کئے گئے ہیں وہ بے بنیاد ہیں، اگر ان کے پاس کوئی ثبوت ہے تو انہیں چاہئے کہ وہ اپنی ہی پارٹی کی مرکزی حکومت کو پیش کریں اور انکم ٹیکس ، انفورسمنٹ ڈائرکٹوریٹ یا سی بی آئی وغیرہ کے ذریعہ تحقیقات کرائی جائیں۔ انہوں نے بتایاکہ یڈیورپا نے الزام عائد کیا ہے کہ وزیر اعلیٰ کے پارلیمانی سکریٹری گووند راج کے مکان پر انکم ٹیکس چھاپے کے دوران ملی ڈائری میں درج ہے کہ اعلیٰ کمان کو ایک ہزار کروڑ روپیوں کی رشوت فراہم کی گئی ہے اور مطالبہ کیا کہ اس معاملے کی سی بی آئی تحقیقات کرائی جائیں۔انہوں نے بتایاکہ یہ چھاپہ ایک سال قبل مارا گیا تھا، اور دستاویزات ہونے کے باوجود یڈیورپا اتنے دنوں تک خاموش کیوں رہے ، اگر ڈائری میں کسی کا نام درج تھاتو انہیں نوٹس کیوں نہیں دی گئی؟۔ اب سیاسی مقاصد کیلئے اس طرح کے الزامات عائد کرنا درست نہیں ہے۔کانگریس پارٹی بھی سیاسی طور پر اس کا جواب دینے تیار ہے۔ گووند راج نے یڈیورپا کے خلاف دس کروڑ روپیوں کا ہتک عزت مقدمہ درج کرنے کیلئے نوٹس جاری کردی ہے، جبکہ کے پی سی سی لیگل سیل کی جانب سے یڈیورپا اور اننت کمار کے درمیان ہونے والی بات چیت سے متعلق سی ڈی کے ذریعہ اے سی بی اور لوک آیوکتہ میں شکایت درج کرادی گئی ہے، جبکہ ایوان ڈیسوزا نے پولیس میں شکایت درج کرائی ہے، یہ تمام معاملات تحقیقات کے مرحلے میں ہیں۔ مسٹر دنیش گنڈو راؤ نے بتایاکہ انہیں ایسا محسوس ہورہاہے کہ بی جے پی میں یڈیورپا کو کمزور کرنے کی کوشش ہورہی ہے۔ جس کے سبب وہ بوکلاہٹ میں مبتلا ہوکر اس طرح کے بے بنیاد الزامات عائد کررہے ہیں۔ اگر اعلیٰ کمان کو ایک ہزار کروڑ روپے دئے گئے تھے تو اس معاملے کی سی بی آئی تحقیقات کی جائیں اور بتایاکہ جب سہارااور برلا کمپنیوں پر چھاپے مارے گئے اس وقت نریندر مودی کے نام کا انکشاف ہواتھا۔ جس کی بنیاد پر سی بی آئی تحقیقات چل رہی ہے، اسی طرز پر گووند راج کے مکان پر انکم ٹیکس چھاپہ کے دوران ملنے والے دستاویزات سے متعلق تحقیقات کرائی جائیں اور خاطیوں کو گرفتار کرتے ہوئے ان پر سخت کارروائی کی جائے۔انہوں نے بتایاکہ یڈیورپا کے ذریعہ جلسۂ عام میں یہ اعلان ہورہا ہے کہ اقتدار پر آتے ہی وہ وزیر اعلیٰ سدرامیا کو جیل کی سلاخوں کے حوالے کردیں گے،جبکہ اس طرح کے بیانات انہیں زیب نہیں دیتے ، کیونکہ کسی کو جیل بھیجنے کیلئے قانون کے دائرہ میں رہنا ضروری ہے اور یڈیورپا جج ہیں اور نہ ہی ڈکٹیٹر ۔انہوں نے بتایاکہ 23 فروری کو فریڈم پارک میں کانگریس کے ذریعہ ستیہ میو جیاتے ریلی کا اہتمام کیاگیا ہے، جہاں پر یڈیورپا کے الزامات کا سیاسی جواب دیا جائے گا۔