نئی دہلی، 31؍اگست(ایس او نیوز/آئی این ایس انڈیا) بنگلہ دیش جماعت اسلامی کے ایک اور رہنما میر قاسم علی کو سپریم کورٹ کے نام نہاد فیصلے کے ذریعہ پھانسی دینے کی راہ ہموارکرنے کو آل انڈیا مسلم مجلس مشاورت کے صدر نویدحامد صاحب نے شدید قابل ظلم قرار دیتے ہوئے شیخ حسینہ حکومت سے اس ظلم سے باز رہنے کا مطالبہ کیا ہے۔نوید حامد صاحب نے کہا کہ بنگلہ دیش جماعت اسلامی اور اس کے قائدین میں کچھ خوبیاں رہی ہوں گی جس کی بنا پر حسینہ صاحبہ نے یکجہتی و یگانگت کا رشتہ قائم کیا تھاتو آج اچانک ان میں کیا خرابیاں پیدا ہو گئی ہیں کہ وہ ان کی موجودگی اور جان کی دشمن بن گئی ہیں!۔موصوف نے کہا کہ حالات گواہی دے رہے ہیں کہ ملک کے اسلام پسند وں کے خلاف موجودہ عوامی لیگ حکومت کی تمام ظالمانہ کارروائیاں انتقامی جذبے سے کی جارہی ہیں جو حد درجہ قابل افسوس ہیں۔مشاورت کے کل ہند صدر نے یہ بھی کہا کہ شیخ حسینہ ایک مسلم ملک کی وزیر اعظم ہیں اور ملک کی نامور شخصیات کے ناحق خون سے دنیا میں ان کے ملک کا وقار متاثر ہو گا، جو اس کے لئے نقصان دہ اور دین اسلام کی ساکھ کو متاثر کرے گا،لہٰذا مناسب ہے کہ وہ قتل و خون کی پالیسی سے گریز کریں اور ملک میں عدل و انصاف اور امن و امان کی فضا قائم کریں جس کی ان کے ملک کو شدید ضرورت ہے۔