بنگلورو:30/اپریل(ایس او نیوز) کانگریس پارٹی نے ایک اہم سیاسی تبدیلی کرتے ہوئے سینئر قائد ڈگ وجئے سنگھ کو ریاستی کانگریس کے انچارج کے عہدہ سے ہٹاتے ہوئے راہول گاندھی کے قریبی مانے جانے والے کیرلا کے رکن پارلیمان کے سی رینو گوپال کو مقرر کرتے ہوئے احکامات جاری کردئے ہیں۔ حالیہ دنوں میں وزیر اعلیٰ سدرامیا یہ کہہ رہے ہیں کہ اگلے وزیر اعلیٰ بھی وہی ہوں گے، اسی طرح چھ سال کی میعاد مکمل ہونے کے باوجود کے پی سی سی صدر اور وزیر داخلہ کے عہدوں پر ڈاکٹر جی پرمیشور برقرار ہیں اور آئندہ بھی ان عہدوں پر برقرار رہنے کیلئے لابی چلارہے ہیں ایسے مرحلے میں پارٹی اعلیٰ کمان کے ذریعہ کی گئی تبدیلی ان قائدین کیلئے تشویش باعث ہوئی ہے۔ اب نئے عہدیداران عنقریب ریاست کا دورہ کریں گے۔ اور کے پی سی سی صدر کے عہدہ پر پرمیشور کی برقراری سے متعلق قائدین سے تبادلہئ خیال بھی کریں گے، سدرامیا کے ذریعہ اپنے حامی وزیر ایم بی پاٹل یا سابق وزیر ایس آر پاٹل کو کے پی سی سی صدر بنانے کی لابی چل رہی ہے۔ ان تمام لابیوں پر روک لگانے کے علاوہ تمام کو اعتماد میں لے کر چلنے والے لیڈر کو صدر بنانے کیلئے مختلف قائدین کے ذریعہ دباؤ ڈالا گیا تھا۔ کانگریس پارٹی میں سدرامیا کے فیصلوں کو ہی اہمیت دی جارہی تھی۔ بی جے پی میں پیدا شدہ داخلی انتشار کا فائدہ اٹھاتے ہوئے دوبارہ کانگریس کو برسر اقتدار لانے کیلئے اور اجتماعی قیادت کو نظر انداز نہ کرنے کے مقصد سے اعلیٰ کمان نے یہ اہم تبدیلی کی ہے۔ کئی دنوں سے یہ قیاس آرائیاں چل رہی تھیں کہ ڈگ وجئے سنگھ کی تبدیلی یقینی ہے۔ تو وہیں پارٹی سے ایس ایم کرشنا، کمار بنگارپا اور شیورامے گوڈا کے علاوہ سریش گوڈا جیسے قائدین الگ ہوچکے ہیں۔ اس کے باوجود بھی ریاستی لیڈروں کے ذریعہ موثر ردعمل نہیں ملا اور نہ ہی ان لوگوں نے اسے سنجیدگی سے لیا۔ اب کیرلا کے کے سی وینو گوپال کو انچارج جنرل سکریٹری نامزد کیاگیا ہے، جبکہ انچارج سکریٹریوں کے عہدوں پر فائز چلا کمار اور شانتا رام نائک کو تبدیل کرتے ہوئے ان کی جگہ مانکم تاگورے، ٹی سی وشنو ناتھ، مدھو یاکشی گوڈاور ساکے شیلاجا ناتھ پر مشتمل پانچ رکنی ٹیم تشکیل دی گئی ہے۔ وینو گوپال، اے آئی سی سی نائب صدر راہول گاندھی کے قریبی مانے جاتے ہیں۔جو این ایس یو آئی کے ذریعہ سیاسی میدان میں داخل ہوئے تھے اور وہ کیرلا کے علاوہ مرکزی وزیر بھی رہ چکے ہیں۔