رافیل پر سپریم کورٹ کے فیصلے کے بعد ، راہل گاندھی معافی مانگیں: بی جے پی
نئی دہلی،14؍ دسمبر (ایس او نیوز؍آئی این ایس انڈیا) فرانس سے 36 لڑاکا طیارے کی خریداری کے معاملے میں بدعنوانی کے الزامات پر سپریم کورٹ کی کلین چٹ ملنے کے بعد کانگریس پر نشانہ لگاتے ہوئے بی جے پی نے جمعہ کو کہا کہ کانگریس پارٹی اور اس کے چیئرمین راہل گاندھی ملک کو گمراہ کرنے کیلئے معافی مانگیں۔بی جے پی کے قومی ترجمان سید شاہنواز حسین نے بتایاکہ سپریم کورٹ کے فیصلے کے بعد یہ واضح ہو گیا ہے کہ کانگریس پارٹی اور اس کے چیئرمین راہل گاندھی نے ملک کو گمراہ کیا ہے۔راہل گاندھی نے ملک کے ایماندار وزیر اعظم کے دامن پر داغ لگانے کا کام کیا ہے۔انہوں نے کہا کہ حالیہ اسمبلی انتخابات میں بھی مختلف پروموشنل جلسوں میں کانگریس پارٹی اور اس کے رہنماؤں نے وزیر اعظم کی شبیہہ کو خراب کرنے کی کوشش کی۔اب جب سپریم کورٹ نے رافیل معاملے میں کلین چٹ دے دی ہے اس وقت کانگریس پارٹی اور اس کے لیڈر جواب دیں۔حسین نے کہا کہ عدالت نے نہ صرف اس معاملے میں دائر پٹیشن کو مسترد کیا بلکہ پورے عمل کو صحیح پایا۔بی جے پی ترجمان نے کہا کہ مدھیہ پردیش، چھتیس گڑھ اور راجستھان کے انتخابات میں بھی رافیل معاملے پر الزام لگا کر سیاسی فائدہ اٹھانے کی کوشش کی گئی۔اب ان ریاستوں میں حلف لینے سے پہلے کانگریس کو ریاست کے عوام سے معافی مانگنی چاہئے۔انہوں نے کہا کہ سپریم کورٹ کے فیصلے کے بعد پورا ملک وزیر اعظم نریندر مودی کے ساتھ کھڑا ہو گیا ہے اور 132 کروڑ عوام میں خوشی کی لہر دوڑ گئی ہے۔ قابل ذکر ہے کہ سپریم کورٹ نے فرانس سے 36 رافیل لڑاکا طیاروں کی خریدی کے معاملے میں نریندر مودی حکومت کو جمعہ کو کلین چٹ دے دی۔ عدالت نے کہا کہ اربوں ڈالر کی قیمت کے رافیل سودے میں فیصلہ سازی کے عمل پر شک کرنے کی کوئی وجہ نہیں ہے۔ چیف جسٹس رنجن گوگوئی کی صدارت والی بنچ نے کہا کہ جنگجوؤں کی ضرورت ہے اور ملک ان طیاروں کے بغیر نہیں رہ سکتاہے۔عدالت نے کہا کہ قیمتوں کے تقابلی تفصیلات پر فیصلہ لینا عدالت کا کام نہیں ہے۔خریداری، قیمت اور آفسیٹ پارٹنر کے معاملے میں مداخلت کے لئے اس کے پاس کوئی ٹھوس ثبوت نہیں ہے۔