بنگلورو،18؍فروری(ایس او نیوز) شہر گلستان بنگلو رمیں 20فروری سے ایرو انڈیا 2019 کاآغاز سخت سکیورٹی کے درمیان ہونے جارہا ہے۔ جموں وکشمیر میں پلوامہ حملے کے بعد ملک بھر میں بڑی ہوئی چوکسی کے درمیان اس شو کی شروعات ہورہی ہے۔ شہر کی پولیس نے ایر شو کے لئے غیر معمولی انتظامات کا اعلان کیا ہے۔ یہاں حفاظتی انتظامات پر تقریباً چار ہزار پولیس جوان اور اعلیٰ افسر متعین رہیں گے۔

شہر کے پولیس کمشنر سنیل کمار نے آج ایک اخباری کانفرنس کے دوران بتایا کہ یلہنکا ایر بیس میں ایر شو کے لئے سیکورٹی انتظامات کے ساتھ ایر شو کی مختلف تقریبوں میں شرکت کے لئے اہم ترین شخصیتوں کی آمد کے مدنظر غیر معمولی انتظامات کئے جارہے ہیں۔ ایر بیس کے اندر اور باہر سکیورٹی کے لئے تین الگ الگ پولیس کنٹرول روم قائم کئے گئے ہیں اور شفٹوں کی بنیاد پر یہ تمام کنٹرول روم متحرک رہیں گے۔ایر بیس کے ا طراف آنے والے تمام محلوں میں گشت ابھی سے بڑھادی گئی ہے۔ ایر شو میں داخلے کے تمام بارہ گیٹوں پر حساس ترین سکیورٹی ، پولیس ، نیم فوجی دستوں اور ایر فورس کے اشتراک سے مہیا کرائی جائے گی۔

ایر شو کے دوران فضائی کرتبوں کا نظارہ کرنے کے لئے بڑی تعداد میں عوام کی شرکت کو دیکھتے ہوئے ٹریفک پولیس نے بھی نگرانی کے لئے الگ سے منصوبہ مرتب کیا ہے۔ ہبال فلائی اوور سے ایر فورس اسٹیشن تک ٹریفک کے لئے متبادل سڑک مہیا کرائی گئی ہے، اور صرف ایر شوکا رخ کرنے والوں کے لئے ایک مخصوص سڑک متعین کی گئی ہے۔ ایر بیس سے اڑانوں کی نگرانی کے لئے مسلح جوان جابجا متعین رہیں گے۔ پولیس کی مدد کے لئے ایر فورس کے علاوہ بی ایس ایف ، سنٹرل انڈسٹریل سکیورٹی فورس اور دیگر نیم فوجی دستے تعینات کئے جائیں گے۔ ہنگامی حالات سے نپٹنے کے لئے شہر کی پولیس نے چار خصوصی ٹیمیں پہلے ہی ترتیب دی ہیں۔ مختلف دفاعی تنظیموں سے آنے والے سائنسدانوں کا قیام جس ہوٹل میں رہے گا وہاں بھی خصوصی سکیورٹی فراہم کرنے کے لئے مرکزی حکومت کی ہدایت کے پیش نظر سخت قدم اٹھائے گئے ہیں۔ اس دوران اس ایرو انڈیا ایر شو میں دنیا کی معروف دفاعی کمپنیوں سے جدید ترین طیارے کرتب کے لئے بنگلور پہنچ چکے ہیں۔ ان طیاروں نے اپنی اڑانوں کا سلسلہ بھی شروع کردیا ہے۔ ایر شو کے افتتاح سے پہلے ہی تجرباتی اڑان شہریان بنگلور کی مرکز توجہ بنے ہوئے ہیں۔ ان میں ایر بس ،امریکہ کے ایف 16 اور ایف 18جنگی طیارے آئے دن غلط وجوہات کے سبب سرخیوں میں چھارہے رافیل طیارے اور دیگر طیارے شامل ہیں۔

اس ایر شو میں شریک ممالک میں امریکہ ، روس ، برطانیہ ، جرمنی، اسرائیل، اٹلی ، جاپان ، کوریا، جنوبی افریقہ ، سعودی عرب، سوئٹزر لینڈ ، یوکرین ، متحدہ عرب امارت وغیرہ سے 372کمپنیاں شامل ہیں۔ ان کمپنیوں سے وابستہ 61 سے زائد طیارے حصہ لیں گے۔ اس کے علاوہ ہندوستان سے ایچ اے ایل ، بی ایچ ای ایل ، بی ای ایل، ڈی آر ڈی او ، بی ای ایم ایل اور دیگر دفاعی ایجنسیوں کے علاوہ دفاعی شعبوں میں مصروف دیگر کمپنیاں بھی حصہ لیں گی۔ اس ایر شو کے دوران وزیر دفاع نرملا سیتارامن اور دیگر دفاعی افسروں سے مختلف ممالک کے دفاعی وفود کی ملاقات بھی طے ہے، اور امکان ظاہر کیا جارہاہے کہ اس ایر شو کے دوران کئی دفاعی معاہدوں پر دستخط کئے جائیں گے۔ 

تیجس کی اچانک لینڈنگ پر افراتفری: آج ایر شو کے تجرباتی اڑانوں کے دوران خالص ہندوستانی ساخت کے جنگی طیارے تیجس کی غیر متوقع لینڈنگ کے سبب کچھ دیر کے لئے ایر فورس اسٹیشن پر افراتفری مچ گئی۔ بتایاجاتا ہے کہ اس طیارے کا پیارا شوٹ اچانک کھل جانے کے سبب اسے لینڈنگ کرنی پڑی۔ ہنگامی طور پر فائر فورس کی گاڑیاں رن وے پر پہنچ گئی تھیں، لیکن کوئی حادثہ رونما نہیں ہوا۔